Daily Newspaper

Game hmasa pahniha goal kua thun thei Inter

10

Italy rama insawn fuh Romelu Lukaku chuan Nilaini zan Serie A inkhel pakhatah Inter Milan tan goal hnih khungin, mualneitu leh kaithar ni bawk Benevento lakah San Siro club chu 5-2 hnehna lian a chanpui a, tun season league game vawihnih khelh atangin Belgian mihang palian hian goal thum a thun tling.

Internazionale hian an league bultanna game hmasa pahnihah goal thun an harsat lo dun khawp mai a, season opener lamah pawh khan 4-3-in Fiorentina an lo hneh tawh a, Serie A match hmasa pahnihah goal kua tehreng an khung tling!

Ti hian, khelh hnih theuha point ruk hmu tawh team panga zingah Inter Milan hian table-ah pathumna luahin, an chungah Atalanta leh hmahruaitu Napoli an awm a, khelh hniha point li chiah la nei defending champion Juventus chu parukna lamah an la su rih!

Anderlecht, Chelsea, West Bromwich Albion, Everton leh Manchester United tana lo khel tawh Lukaku hian tan atanga minute khat pawh a liam hmain Achraf Hakimi-a cross chu goal-ah a chantir a, Roberto Gagliardini chuan home team hmahruaina belhchhahin, darkar chanve tlin dawnah Belgian striker Lukaku bawkin an goal thumna a thawh a, Gianluca Caprari chuan Benevento siphurh pakhat sut then bawk mah se chawlhlawk dawnah Hakimi chuan an goal phai chhungkhatin, half time-ah Milan khaw club hian 4-1 zetin hma an hruai hman.

Second half-ah pawh goal thun hmasa zawk chu mikhual team leh tho niin, minute 71-ah Alexis Sanchez siamsak atangin substitute Lautaro Martinez chuan Inter goal ngana a tilut a; minute nga a liam leh rualin Caprari chuan Pippo Inzaghi team zangnadawmna goal khat a thunbelh ve leh bauh a, goal dang luhbelh tawh loin Conte team-in an mikhualnaah nuamsain point thum an thawkchhuak.

Inter hi a tir game hnih atanga point ruk thawkchhuak thei team pali zinga pakhat niin, Napoli, Hellas Verona leh AC Milan-te pawh an game khelh tawh pahnihah an chak ve vek bawk.

Benevento pawh khan top flight-a an game hmasaberah chak lo thei dinhmuna an dinna atanga Sampdoria lehthalin point thum nen bul an tan zet a, Italian giants lakah an beisei angin point an thawkchhuak zo ta lo a ni.

Inter boss Antonio Conte khan Fiorentina an hneh tyma lut hmasa pasarih awltirin midang a luhhmasaktir a, kaithar hneh turin a team siksawi pawh an la tha tawk hle a ni.

Nilaini Serie A inkhel dangah Udinese chu sihnih faiin an mikhual Spezialakah an tlawm a; Atalanta pawhin 4-1-in mualneitu Lazio an sawp ve bawk.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy