BJP te chuan Gandhi family chu ‘class hran, elite leh Constitution chunglam’ ah an inngai tia sawiin Lok Sabha MP atanga Rahul Gandhi disqualify a nih hnua Opposition tena an beihna a chhang let zui zel bawk a.
Ruling party chuan Congress te bei tur hian Union Minister Gajendra Singh Sekhawat chu thehchhuakin Wayanad MP disqualify a nihnaah BJP emaw sorkar emaw in engmah inhnamhnawihna a nei lo a ti bawk a.
“Congress tena judicial leh dan anga thiltih an chhanlet dan en hi chuan Gandhi family chu India judicial process chunglam, Constitution leh democratic system chunglama awmah an dah a ni,” tiin press conference a neihnaah a sawi.
Rajasthan MP chuan Surat court chuan Gandhi chu hun remchang a pe char char tia sawiin Modi surname a hman chungchangah pawh ngaihdam dil tura tia hun a pek thu a sawi a, mahse, Rahul Gandhi chuan duh lovin judiciary chu a cho zui a ni a ti bawk.
“Danin a tihtur a ti a, BJP emaw sorkarin emaw engmah tih a nei lo. Gandhi chhungkua hian anmahni chu ‘class hran hla, elite leh Constitution chunglam’ ah an inngai a ni, tia sawiin Shekhawat chuan Lok Sabha chuan MP te disqualify turin discretionary power a nei ngawt lo tiin a sawi bawk a.
“Democracy dinhmun derthawngah a awm titute chuan democratic system chu hmusitin judicial verdict chu duh lovin kawthlerah lungawilohna an lantir zawk a ni,” tiin a sawi bawk.
Rahul Gandhi chuan journalist te pawh a press conference-ah a nuihzat nghek tawh tia sawi bawkin Union minister chuan, “He ram hmusit nan hian hun remchang a hlah lo va, democracy pillar tin laka a chungnunzia lantir a tum thin,” tiin a sawi bawk.
“Rahul Gandhi te ang hi democracy tana mi hlauhawm a ni a, a chhan chu khawih phak loha awm angah a inngaih vang a ni,” tiin Sekhawat chuan a sawi bawk a, “Court-in hun remchang a pe reng chung pawha ngaihdam dilna pawh siam duh lova luhlul chhuaha a invaivung hi a zahthlak a ni,” tiin BJP leader chuan a sawi bawk.
Sekhawat chuan Congress leader te Mallikarjun Kharge leh Jairam Ramesh te ang chu Rajya Sabha chairperson hmusitah a puh bawk a. Rahul Gandhi pawh patriot leh freedom fighter Veer Savarkar te hmusitah a puh bawk.
“Rahul Gandhi hian Savarkar a nih lohzia a sawi tawh a. Raul hian Savarkar a hrechiang duh a nih chuan Andaman Jail-ah tangin hun hmang se chutah chuan Savarkar anmahni inphata hun a hman dan a hrefiah thei ang,” tiin Shekhawat chuan a sawi bawk.