Daily Newspaper

GANDHISM-IN KHAWVEL A KAWHHMUH

31

-Pu Prahlad Singh Patel

(He thuziaktu hi Union Minister of State for Culture and Tourism, Government of India a ni)

Mahatma Gandhi, India Hnampa suangtuahnate chu vawiin ni hian khawvelin a hlutzia an hmuthiam mek a. Khawvel mihringte hian an harsatna hmachhawnte chu a zirtirna atanga hriatfiah tumin sutkian an tum a. Inel leh intlansiakna nasa tak karah hian khawvel hian rinna leh beiseina a neihte hi Gandhism-ah hian thuk tak a innghat a. Mihringte hian indona hi buaina chinfelna a ni lo tih an hrethiam chho mek a. Khawvel hmun hrang hranga tharum thawhna hmanga revolution te hian engmah min thlen lova. Hun hian Satyagraha leh non-violence-te hi kawng zawh tur tha ber an ni tih a rawn pholang tawh a. Mipui an ni emaw, institution an ni emaw ram an ni e maw tunah chuan lungawilohna lantir dan tha zawk a awm tih hi hai rual a ni lo.

Gandhiji zirtirna hlutzia hi kan hre chho tawlh tawlh zel a. Kan tunlai khawvelah hian environment humhalh hi hnam tinin kan ngaih pawimawh ber pakhat a ni chho mek a. Intellectual leh environmental activist-te chuan khawvel hmun hrang hrangah kan environment/sik leh sa boruak chhe mek zel duhloh entirna atan kawngte an zawh thin a. India hnampa, Mahatma Gandhi chuan environment chungchangah zirtirna min pe a. Bapu hunlai khan environment hian ngaihven la hlawh lutuk lo mah se Gandhiji khan thil a thlir zau em em mai a, tunlai huna kan harsatna tawh turte hi a hunlai khan a lo hmuthiam daih tawh a. Gandhiji khan “Khawvel hian mi zawng zawng mamawh tawk a phuhru thei a, mahse mi zawng zawng duhamna erawh a phuhru thei lo” tiin a sawi a. A article ziah ‘Swasthya ki Kunji’ ah chuan boruak thianghlim chungchanga a ngaihdan a sawi a. Thil pathum kan mamawhte chu boruak, tui leh eitur annih thusawiin chung zingah chuan boruak thianghlim a pawimawh ber a ni a ti a. Gandhiji chuan India ram mipuite chu charkha hmanga la hlum a, kuttah kawr ha turin a fuih a. He hmalakna hi Swadeshi chawhthawhna atan anih mai bakah bawlhhlawh titlem tur leh textile mill atanga bawlhhlawh chhuak tur tihtlemna atana a tih a ni.

Gandhiji khan thingtlang hmasawnna a ngai pawimawh hle a. Thingtlang khua chawisante a ngai pawimawh a, Gandhiji khan Harijan Sevak ah kum 1946 khan heti hian a ziak a, “Thingtlang khuaahte hian art leh workmanship te tihhmasawn a ni tur a ni a, khaw pawn lamahte pawh an thil siamchhuahte hlutsak tur a ni” a ti. Gandhiji khan ram zalenna atan non-violent hmangin a bei a, hetihrual hian a program tha tak tak hmangin India ram khawtlang inrelbawlna humhalh leh chanhim a tum bawk a ni.

Gandhiji khan zirna hi khawtlang leh ram siamna atana tangkai ber pakhatah a ngai a. Champaran Satyagraha kalpui lai 1917 khan Barharwara Lakhansen-ah basic school hmasa ber a din a. Zirna pawimawhzia ngaihtuah chungin May ni 8, 1937 khan Harijan-ah heti hian a ziak a, Mihringin finna leh hriatna pumhlum a nei thei lova, taksa ringawt emaw thinlung emaw thlarau ringawt pawh a ni thei lo. Hetiang zawng zawngte hi a mal theuhin an pawimawh vek a, mumal leh awmze nei taka belhbawm khawm annihin mihring famkim a lo ni thin a ni a ti a. Hei hi zirnain a tum bulpui ber a ni.

Swadeshi hmang chauhin India ram hi ram intodelh leh ram chak a ni thei dawn a. Vawiin ni hian India ramah hian Swadeshi lam kawng nasa zawk a panna boruak a awm mek a. Hei hian Industry tenau zawkte tan hmasawnna kawng a hawn sak a. Hemi hmang hian hmun hla taka cheng thingtlang khaw mite tan sum leh paia intodelh theihna kawng a inhawng a. Gandhiji khan India ram hi Swadeshi hmang a intodelh turin a duh a. Hun rei tak hnuah hemi kawng hi kan zawh chho mek a. Hei hian rah tha a chhuah mek a. Vawiin nia mipui mimir zinga Swadeshi lama harh tharna thleng mek hi thil lawmawm tak a ni.

Thingtlang khuate chu a hriselin a fai tur a ni a. Sorkar chuan rampum huapa he hmalakna kalpui tur hian mass movement a buatsaih a. Thingtlang khua leh khawpuite chu he faina lama program hmang hian tihdanglam mek an ni a. Gandhi chuan thingtlang khua a reform kalpuiah faina hi telh a nih loh chuan kan thingtlang khuate chu bawlhhlawh paihna hmunpui an ni chhunzawm reng dawn a. Thingtlang khaw faina hi mihring nun atanga lak hran theih loh thil pawimawh a ni a. Hei hi thil pawimawh tak mahse harsa tak si a ni a. Faina ngai pawimawh lova hun kan lo hman thin bansan turin thawhrimna leh huaisenna kan mamawh a. Gandhiji khan khawpui bawlhhlawh pawh a ngaimawh hle thin a. Hemi chungchangah hian khawtlang ramte atangin zir tur kan neih thu leh khawpui vawnfai hlutzia kan zir chhuah a ngaih thu a sawi a. Hengte hi Gandhiji atanga kan la zirchhuah ngai a ni.

Gandhiji a zirtirna hlutna hi a chuai thei lova. A chhan ber pakhatah chuan amahin a tak ngei a a zir chhuah leh finfiahte an nih avang a ni a. A hlutna hian hun bituk a nei lova. Vawiin ni hian khawvelin Gandhi a zirtirna kawng hi a tha ber leh daih rei ber a ni tih a hmu fiah tawh a ni.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy