Tunlaiin Mizoramah ganja a hluar a, thalaite zingah he ruihhlo hlauhawm intihhmuh hi an awm a ni awm e. Man tur a tam a ni ang, a mantu lam pawhin an man hnem.
Mizoram Excise & Narcotics (MEN) department-in kuminah April thla thleng khan ganja hi kg 110.421 an man a, thla li chhunga manah chuan a tam tham fu mai.
Nikum khan May thla thlengin ganja hi kg 406.719 an man a, kum dangah kum tluan pawhin hetiang zata tam an la man ngai lo. May thla a ral khan 2024 kha ganja man hnem ber kum a ni der tawh a, chumi hnuah an man belh teuh bawk. Nikuma an man zawng zawng chu kg 578.592 a ni a, mak tih tham khawpa tam a ni. Kuminah pawh kum tir atangin an man leh malh malh bawk.
Mizoram Police te pawhin ganja hi an man hnem a, nikum khan kg 305.387 an man. 2023-ah kg 112.943 an man a, 2022-ah kg 129.825 an man. MEN department-in 2023-ah kg 179.233 an man a, 2022-ah kg 152.214 an man.
MEN department hotute chuan ganja hi khawchhak lam atanga rawn lut a ni lo a, tunlaia Mizorama lut hi Shillong leh Tripura atanga rawn lut a ni ber an ti.
|halai leh tleirawl zingah ganja intihhmuh hi an awm tih an sawi a, kum lama la naupang tak takte zingah pawh a awmzia hre vak lova zu an awm tih an sawi bawk.
Khawvel mi larte zingah ganja leh a kaihhnawih lam ti thin an awm a, chung mite chu ngaisangin intih changkan nana hmanga ganja hi zu ve an awm, MEN department hotute chuan an ti. Thilsual an ti tih pawh hre lova meizial anga ngaia ganja zu thin an awm thu an sawi bawk.
Ganja Man zat
Kum MEN Police
2022 Kg 152.214 Kg 129.825
2023 Kg 179.233 Kg 112.943
2024 Kg 578.592 Kg 305.387
Ganja a hluar, man tur a tam
