May a liam a ni chauh a, kum chanve pawh a la ni lo; mahse kumin hi ganja man hnem ber kum a ni der tawh!
May ni 31 thleng khan Mizoram Excise & Narcotics (MEN) department te’n ganja hi kg 406.719 an man tawh a, tihian 2024 hi ganja man hnem ber kum a ni tawh. A hmain kum tluan pawhin hetiang zat hi an la man ngai lo.
2014-ah khan ganja hi kg 402.227 an man a, a hma chuan hei bak hi kg 400 a tling ngai lo. Kuminah thla nga chhungin kg 400 a pel ta der mai!
MEN department chhinchhiahna enin, 2017-ah khan kum tluanin kg 392.018 an man a, 2021-ah kg 376.204, 2019-ah kg 370.068 an man. Heng hi an man tam kum a ni.
MEN department hotute chuan “Ganja hi a hluar a ni,” an ti a, tleirawl, thangthar zingah a hluar an ti.
High school leh higher secondary school kal rualte zingah ganja hi a hluar an ti a, tun hnaiah tleirawl zingah ganja hi a hluar thar an ti.
Ganja hi a kawng a inthlak tih an sawi a, a hma chuan Manipur atangin Mizoramah a rawn lut a, tunah chuan Tripura leh Shillong atangin a rawn lut nasa tiin MEN department lam chuan an sawi.
An sawi danin, Tripura khawthlang lama Sepahijala atangin ganja hi a rawn lut nasa a, nalh takin an ‘compress’ a, maxi cab service-ah te an rawn thawn thin an ti.
Shillong atangin a rawn lut nasa tih pawh an sawi a, mak an tih deuh chu Shillong atanga rawn thawntute hi Mizo ngei an ni tih hi a ni.
“Sa rep an rawn thawn a, chumi karah chuan an dah a. Kan Mizopuite ngeiin Shillong atang hian ganja hi an rawn thawn tlat mai a, a mak khawp mai,” MEN department hotu pakhat chuan a ti.
Tun hnaia ganja man zat
Kum Man zat
2019 Kg 370.068
2020 Kg 127.449
2021 Kg 376.204
2022 Kg 152.214
2023 Kg 179.233
Ganja man hnem kumte
2024-ah
(May thleng) Kg 406.719
2014-ah Kg 402.227
2017-ah Kg 392.018