Kum a la tawp lo a, mahse kumin hi ganja man tam ber kum a ni tawh. Man tam ber kum a nihna hi a rei tawh a, kum chawhma lamah khan kumin hi ganja man tam ber kum a ni tawh.
Mizoram Excise & Narcotics (MEN) department-in 2014 khan ganja hi kg 402.227 an man a, khami kum kha ganja an man tam ber kum a ni thin. 2014 kum tluana an man aia tam hi kuminah January atanga May thla thleng khan an man hman.
May thla thlenga an man kha kg 406.719 a ni a, thla nga chhunga an man hian kg 4 velin 2014 kum tluana an man a khum.
May thla hnuah pawh an man belh zel a, an man mawlh mawlh a ni ber. November thla thlengin kuminah kg 585.954 an man tawh a, thla sawmpakhat chhunga an man hi a tam tham hle.
Ganja hi tunlaiin a hluar a, MEN department hotute chuan a hluar thu leh thangthar zingah a hluar thu te an sawi.
Nikumah pawh ganja hi a hluar a, nikum kum tluana an man kha kg 179.233 a ni. Hei pawh a tam tham a, kumina an man tawh zat nena khaikhin chuan a lang tlem kawk thei!
Ruihhlo chi dang khawchhak lam atanga Mizorama lut a nih laiin ganja hi chu India ram state dang atanga lakluh a ni a, MEN department hotute chuan Tripura atanga lut a tam thu leh Meghalaya atanga lut a tam bawk thu an sawi.
|hangthar zingah ganja hi meizial zuka zu mai an awm thin thu an sawi a, thilsual ti-ah pawh inngai lovin ganja hi meizial zukin an zu mai mai a, an nu leh pate pawhina an hriat loh, chutianga zu chu an awm thu an sawi.
Khawvel mi lar zingah ganja leh a kaihhnawih lam ti thin an awm a, chutiang mite an ngaihsan vanga zu ve mai an awm thin thu an sawi a, ganja hlauhawmzia hi inzirtir a ngaih thu an sawi.
Ganja man tam ber kumah Ganja man belh zel
