Gas hnianghnar neih zel dan tur sawi
Food, Civil Supplies & Consumer Affairs minister B Lalchhanzova chuan Thawhlehni khan Indian Oil Corporation hotute kawmin eirawngbawlna gas hnianghnar neih zel theihnana tul leh mamawh a sawipui.
Mizoramah kum dang zawng aiin ruah tla a tam tih minister hian sawiin, hei hian ei leh bar chawkluh kawngah harsatna hrang hrang siam mah se, LPG supply-ah harsatna lian a thleng lo chu lawmawm a tih thu a sawi a. Hetiang dinhmun thleng tura IOC Ltd, LPG distributor leh thawktute inpeknaah lawmthu a sawi bawk. Mipui tan thahnemngai lehzuala thawhho puiah a sawm a ni.
IOC Indane Divisional office Silchar deputy general manager and head Rajjyoti Das chuan Mizoram sawrkar thawhpuinaah lawmthu sawiin, Mizoram mipuiin hnianghnar taka LPG supply an hmuh theihnan theihtawp an chhuah thin tih a sawi.
Mizoram hian thlatin LPG bur 6000- 7000 inkar mamawh ang a ni a, truck 20- 25 phur vel a ni. Inkawmnaah hian Mualkhanga LPG Bottling Plant siam thar mek leh oil depot din thuai a nih theihnana hmalak dan sawi a ni bawk.
Gas hnianghnar neih zel dan tur sawi
