Gaza-ah tam vangin mi pasarih thih belh leh
Hamas health ministry chuan darkar 24 liam ta chhungin ei tur kham neih loh vangin Gaza Strip-ah mi pasarih an thi leh tawh tih an sawi.
Heng mite nen hian kum 2023 atanga Israel-Hamas indona a chhuah atangin ei tur neih loh vangin naupang 89 telin mi 154 an thi tawh.
Israel chuan Gaza-a puihna lut tur dan an nei lo tih an sawi a, Europe-a an thawhpui, UN leh puitu pawl dang tam tak chuan an pawm lo thung.
Hetih lai hian US special envoy Steve Witkoff chuan Ningani khan Israel hi a tlawh a. Hei hi thla thum dawn hnua a tlawh leh hmasak ber a ni.
Gaza damdawi inte chuan chhim lama Rafah-a Gaza Humanitarian Foundation (GHF) puihna semna hmunah puihna dawn tum Palestinian paruk thah an ni leh bawk niin an sawi.
Ei tur semna hmun hi an hawn hnu lawkah luh tumte chu Israeli tank-in a kap nia sawi a ni a. GHF erawh chuan an hmun leh a bul hnaiah hetiang hi a thleng lo niin an sawi ve thung.
GHF thil semna hmunah hian ni tin deuhthaw mi thahna a thleng a, Palestinian-te chuan Israeli sipai leh venhim hna thawk tura an rawihten puihna dawn tumte hi an kap thin niin an sawi.
Nilaini zan khan Hamas health ministry chuan a hma darkar 24 liam ta chhungin mi 103 thah an nih thu leh in chim karah ruang pakhat hmuh a ni tih an tar lang a. Thi zinga 60 hi puihna dawn tum an ni.
Thawhlehniah khan puihna phur lorry 109-in Gaza an lut a; mahse, an tum hmun an thlen hmain mipuiin bawrin an thil phurh an la zo vek nia sawi a ni.
UN chuan Gaza-a tam thleng mek mamawh phuhru tur hian ni tin truck 600 vel mamawh a ni tih an sawi.
Israel hian thla hnih inkahhai a tawp hnuah March thla tir khan Gaza-a puihna luh hi dangin sipai chakna nen chawlhkar hnih hnuah Hamas a bei zui lehnghal a. Thla hnih hnuah ei tur, damdawi leh tuialhthei a van em avanga mi nawrna avangin a hawng.
Gaza-ah tam vangin mi pasarih thih belh leh
