Gaza City-a naupang pangaa pakhat zelin ei tur kham lo – UN

Gaza City-a naupang pangaa pakhat zelin ei tur kham lo – UN
UN hnuaia Palestinian refugee agency (Unrwa) chuan Gaza City-a naupang panga zela pakhat chu ei tur kham ei lo an nih thu leh an pun zel thu a sawi.
Ningania thuchhuah a siamah Unrwa Commissioner-General Philippe Lazzarini chuan a thawhpuiten, “Gaza-a mihringte chu an thi emaw, an dam emaw, ruang kal thei an ni mai,” an ti tih a sawi.
Mi tanpuitu leh mihring dikna chanvo humhalhtu pawl 100 chuang chuan tampui mitthi a thleng dawn tih sawiin sorkarte chu che turin an nawr.
Gaza-a thil lut tur thununtu, Israel erawh chuan engmah danchah a awm lo va, Hamas chu hetiang a thlen chhanah an puh.
UN chuan Gaza-a puihna lut chu ‘tlem tê’ chauh a nih thu leh rimtamna chu ‘hetiang a la thleng ngai lo’ tih a sawi.
Lazzarini-a chuan ‘mi 100 chuang, a tam ber naupang chu riltam avangin an thi nia sawi a ni’ tih a tar lang.
“Kan team-ten an hmuh naupangte chu an taksa a chhe hle a, an chak lo va, enkawl thuai loh chuan thih mai an hmabak a ni,” a ti a. Israel chu ‘puitu leh buaipuitute tibuai lo leh tiamchin awm lova Gaza-a luhtir phal turin’ a ngen bawk.
Nilaini khan World Health Organisation (WHO) chuan Gaza-a cheng tam zawk chu ‘an tam’ tih a sawi.
“A huhova tamna tih baka sawi ngaihna ka hre lo, mihringin a thlentir a ni,” tiin WHO chief Tedros Adhanom Ghebreyesus-a chuan a sawi.
Nilainia Gaza-a Israeli sipaite a tlawhnaah Israeli President Isaac Herzog chuan an ramin puihna leh tul dang chu ‘khawvel dan zam zawmin’ an pe zel tih a sawi.
Israel hian thla hnih inkahhai a tawp hnuah March thla tir atang khan Gaza-a puihna phurh luh a dang a. Thla hnih dawn hnuah tlem hawng mah se ei tur, tuialhthei leh damdawi an indaih lo hle.
Israel hian US nen puihna sem dan thar, Gaza Humanitarian Foundation (GHF)-in a enkawl a kalpui nghal a. UN human rights office chuan sem dan thar kalpui a nih hnuah Israeli sipaiten ei tur dawn tum Palestinian 1,000 chuang an that tawh tih a sawi.
Israel hian puihna thil semna bul hnaiah Hamas-in mi an tiralti thin niin an sawi a, an sipaite chuan mi tihthaih nan chauh silai an hmet puak a, civil mi an kap ngai lo niin an sawi.
GHF pawhin UN hian Gaza-a Hamas enkawl health ministry atangin thi zat hi ‘a dik lo’ an dawng niin a puh bawk.