By Reuben Lalnunthara Hnamte
The Salvation Army khawvel puma hruaitu lu ber General Brian Pedle te nupain Mizoram min rawn tlawh chung changah khan thil tlem han thai lan ve ka duh a. Mizorama an lokal hma khan India ramah Territory hnih tlawhin kar hnih lai hun an hmang tawh a. An chauvin an thawkrim hle tawh a ni tih pawh a hriat a ni. Mizoram an lo thlenga, chawlhna hun pawh awm lek lovin programme khat tlatin karkhat chhung hun min hmanpui leh a. Chutih rualin hrehawm ti hmel leh chau hmel pu hauh lovin hlim tak leh nuam ti awm takin mipuite tan rawng min bawl sak a ni. Mizoram atanga an haw hnuah Africa te leh hmun dang tlawhin an zin leh nghal dawn a, an rim turzia chu kan hre mai awm e. General kum 4 an nih chhung hian khawvel hmun hrang hranga Sipai Pawl tlawhin an hun an hmang a ni ber mai a, khawvel pum huapa evangelist tih hial tur khawp an ni.
General nih hi thil namai a ni hauh lo va; thlarau mi, thusawi thiam leh hruaitu nihna (Leadership) nei tha an nih ngei ngei a ngai a. An thlan dawn pawh hian an uluk em em mai a ni. General thlangtute hi High Council tih a ni a. Khawvel puma Salvation Armya Commissioner rank leh Full Colonel Rank chin ten an thlang thin a. General thlan dawn chuan Karkhat chhung an inkhung hrang a, tawngtaina ni 2 chhung neiin, General thlanna atana pawimawh, President turte in ruatin, nominate te an siam a, chu ta tang chuan General tur chu uluk takin an thlang chhuak thin a ni. Kan mizo Officer zingah pawh General thlangtu zinga tel – Commissioner Chianghnuna te nupa, Commissioner Lalthanngura te nupa, Commissioner Lalkiamlova te nupa, Commissioner Lalngaihawmi leh Commissioner Lalzamlova te nupa an lo awm tawh a ni. Commissioner Lalkiamlova te nupa phei chuan an service chhung khan General thlannaah vawi 4 ngawt an tel hman a ni. May 2023 hian General thlanna a awm leh dawn a, he tah pawh hian tuna thawk lai Full Colonel Rank 2 kan neih, Colonel Lalhmingliana te nupa leh Colonel Vanlalfela te nupa hi tel thei tur ngaih an ni.
Tun General min rawn tlawha thil danglam tak kan hmuh tak chu- kan mizo Officer tlangval fel tak Capt.Charles Chalrimawia General ADC(Private Secretary) ni-a a lokal kha a ni. General ADC-ah hian sap pachal lo hi chu awm thei turah pawh kan ngai ngai lova, mizo tlangval ngei mai khawvel pum huapa Secretary an ni pha kha mizote kan duai lohzia ti langtu a ni a, mizote min chawimawi hle a ni a tih loh theih loh. Khawvel pum huap anga lanna hi mizote hian kan nei meuh lo maithei a ni. Capt.Charles a atang khan Kan General te pawh khan mizote min hmuh dan thlir dan a tha em em mai a, kha khan mizote zinga awm kha nuam an tih phahin, an tlangnel phah bawk. Khawvel pumin mizote min hmelhriat phah hle dawn bawk a ni. Chuvangin Capt. Charlesa (Mi tea) hian khawvel huapin mizote min chawimawi hle a ni tih hi i hre tlang teh ang u. Generalte nupa lah khan Capt.Charles (mi tea) hi Mizo a ni tih kha chhuang takin khawvel hmun hrang hrang an fannaah an sawi thin leh nghal a, mizo nih hi a nuam veng veng mai a ni.
Tun tuma General lokal te hi an thusawi reng reng a thain mizo mil zawng tak a ni a. General dang lokal tawhte pawh an thain thusawi an thiam em em vek laiin, tun tuma lokalte thusawi hian keima nunah chuan thu a sawiin, min hneh bik riau hian ka hria a. An Pathian thu sawi dan hmang hrim hrim khan an thlarau mi zia a tilang a, mipui an hneh em em mai a ni. Mipui lamkualna zinga tih takzeta an han lamkual ve maite pawh kha an fakawmin mizote min pumkhat hle tih a hriat a. Commissioner Rosalie Peddle-in a thusawinaa “Thlarau thianghlim hi ringtu nun leh rawngbawlnaa thil pawimawh ber a ni” tih a sawite kha a ropuiin mizo ten kan hriatthiam zawng tak a ni a. Inkhawm tawp zana The General-in “Rei lo te nawmsakna khawvel thilte chu hnawl ula; in nunah, chhungkua, khawtlang leh Zoram tan Isua chu thlang ang che u” a tih te kha thusawi ropui tak a va ni em! Mizote hriatthiam zawng leh thlarau tak khan thu an rawn sawi tlat kha, a ngaithlatute tan malsawmna hlu tak a ni.
Kan Mizoram Sorkarina an lo mikhual dan leh dawnsawn dan te kha a ropuiin an ti tha takzet a. General te pawh an lawmin Mizoram nuam an ti a, an haw hnu pawhin social media kaltlangin, Mizoram nuam an tihziate, kan khawmpui nuam an tih dan te leh mizo mipui an hmuh that dan te an la rawn sawi a ni.
Khawvel buai mup mup karah keini mizote’n Thuchah ropui tak kan ngaithla thei a, Lalpa pawlna kan chang kha a hlu tih loh rual a ni lo. Kohhran indaidanna kan la na lutuk thin hian mizo kan nihnaa kan inpumkhat tur ang hian min ti pumkhat lovang tih hi hlauhawm tak a ni. Kohhran indaidana hi paih zel ila, Pathian thutakah hian inlungrual taka rawng kan bawl ho zel hi a tul takzet tawh a ni.