Germany-ah far-right ten hma sawn

Germany’s anti-immigration Alternative for Germany (AfD) te chuan eastern state Thuringia-ah dinhmun tha hlein far-right party te hi an che tha hle.
AfD te hian vote tla atanga hmun thuma thena hmun khat dawn hmuin conservative CDU te aiin point kua laiin an sang zawk a ni.
Tihian far-right te hian World War Two hnuah state parliament election-a an chak hmasak ber an tawng ta a, mahse, Thuringia-ah hian sorkar an siam beiseiawm loh thungin party dang ten thawhpui an tum a rinawm loh tia sawi a ni.
AfD te hi Pathiannia a state lian inthlan dang Thuringia thenawm Saxony ah pawh pahniha lai an hauh bawk.
Inthlan result tihchhuahah CDU te chuan 31.9% vote an hmu a, AfD te aiin an hmu sang zawk a. Party dang Social Democrats, Greens leh liberal FDP te aiin AFD ten an hmu sang zawk.
Chancellor Olaf Scholz chuan inthlan result chu duhawm lo tia sawiin mainstream party te chu tangruala far-right te tel lova sorkar siam turin a ngen a. “AfD te hian Germany an tichhia a ni. Economy an tichak lo va, soceity thliarhrangin Germany hming an tihliau a ni” tiin a sawi.
Thuringia-a AfD top candidate Bjorn Hocke, Germany a sawisel leh fak hlawh tak bawk chuan an hnehna chu chhinchhiahtlak tiin a sawi thung a.
Hocke party te hi right-wing extremist tia hriat lar niin Nazi slogan te an aupui avanga chawitira awm tawh an ni a, history teacher ni thin niin Nazi slogan chu hriat sa reng avanga aupui an ni lo tiin a insawi thiam thung.
Germany-a Holocaust survivor hriat lar ber pakhat Charlotte Knobloch chuan inthlan chu World War II atanga kum 68 hnua neih a ni a ti a. Inthlan result chuan Germany chu ‘nghet lo, rethei zawk, him lo zawk leh chenna atana duhawm lovah a chhuah mek’ tiin a sawi.
Nakum lawkah Germany-ah federal election a awm dawn a, opinion poll-ah chuan AfD te chu pahnihna an ni mek a. Co-leader Alice Weidel chuan inthlan result chuan Germany-ah party pathum lian zet zet a awmzia a pholang a, eastern state a AfD te dinhmun tha chuan Germany-a rorel tura mipui ten an duhna a pholang tiin a sawi bawk a. “Kan tel lo chuan sorkar ngelnghet a awm thei dawn lo tih a chiang a ni” tiin a sawi.
Bjorn Hocke pawhin chu chu tuihnihin CDU voter tam tak te chuan AfD te nena thawhho an duh tiin a sawi bawk a. AfD te chuan party dang te thhlawpna tello chuan Thuringia-ah rorelna a lekkawh thei dawn lo va, CDU te chuan chiang takin AfD te chu an thawhpui theih dawn loh thu an sawi lawk sa bawk a. Conservative party-te tel lo chuan majority sorkar siam ngaihna awm lova ngaih a ni bawk.
Eastern Germany-ah hian vote nei mi maktaduai nga vel awmin public broadcaster ZDF tena survey an neihah kum 30 hnuai lam 30% vel te chuan AfD an vote tia sawiin thalai zawk vote hui hnem ber an ni tiin an sawi.
AfD te vote an nihna chhan ber chu immigration vang a ni a, a bik takin refugees leh asylum chungchang vang a ni tia sawi a ni.
“Politician ten thutiam tam tak an nei a, a bik takin refugees leh asylum chungchangah a ni zual a. Mahse, engmah tih an nei lo, an tiam ringawta tih an nei zui si lo va, chuvangin AfD te ka vote a, ka thutluknaah ka chiang a ni” tiin voter pakhat Michael chuan a sawi.
Vote thlak hma lawk karah western Germany a Solingen a street festival neihnaah mi pathum tualthi an awm avangin boruak a siam nasa zual a, heng mi pathumte tihlumtu nia rinhlelh Syrian mi chu man a ni zui a ni.
AfD te chuan Ukraine hnena ralthuam pek pawh tihtawp an duh bawk a. Thuringia ah hian seat 88 awmah AfD ten seat 32 an la a, CDU ten seat 23 an la thung a ni. Chancellor Scholz’s Social Democratic Party (SPD) te chuan seat ruk chauh la theiin Greens leh liberal FDP te phei chuan seat khatmah an la lo a ni.
Saxony-ah chuan conservative CDU ten seat 42 an la a, AfD ten seat 41 lain Sahra Wagenknecht party te chuan pathumna hauhin seat 15 an la ve thung.
Tunkar hian eastern state tho Brandenburg te chuan inthlanna an nei dawn bawk a, opinion poll-ah chuan AfD te chu hmahruai mek niin mahse Social Democrats te leh conservative te chuan an hlat lo hle thung.
AfD te hi domestic intelligence te chuan Thuringia mai bakah Saxony-ah pawh right-wing extremist tia an sawi an ni a. May thla pawh khan German court chuan BFV intelligence tena AfD te extremism lama rinhlelha an dah chu a pawmpui bawk a ni.