Germany rel kawng zawh sualah mi pathum thi

Germany rel kawng zawh sualah mi pathum thi
Germany chhimthlang lama mihring phur relin a kawng zawh suala a chet sualnaah mi pathum vel an thi a, mi eng emaw zatin hliam an tuar bawk tih police-in an sawi.
Operator Deutsche Bahn chuan chet sualna hi Stuttgart bula Riedlingen-ah ‘a chhan hriat lohvin’ a thleng tih an sawi a. Chet sualna thlen hma lawk hian ruah leh thlipui a thawk chiam nia sawi a ni.
Relah hian mi 100 vel chuangin a pindan pahnih chuan ramngawa an tlan lai, Pathianni tlai dar 06:10 (India-a zanb dar 10:40) velah a kawng a zawh sual niin German news agency dpa chuan a tar lang.
German Chancellor Freidrich Merz chuan ‘thite a sun’ tih X-ah tar langin an chhungte pawh a tawrhpui tak zet tih a sawi.
Interior leh transport minister-te nen an inbe reng a, emergency services pawh an mamawh ang apiang an chhawpsak zel tur thu a sawi.
Ulm police chuan an chhui mekah ‘mi pathum an thi a, a chuang ve dangte pawhin hliam na tak tak an tuar hlawm’ tih an sawi.
Thlalak thehdarhah chuan rel pindan hi a sir zawngin a let a, emergency service mi leh sa thahnem takin an bawr a. A bul vela thing tlu pawh hmuh theih a ni.
Deutsche Bahn chuan rel hi km 90-a thui, Sigmaringen leh Ulm inkara a tlan laiin a che sual tih an sawi.
“A chhan tak hi tunah rih chuan engmah hriat theih a la ni lo,” tiin X-ah an tar lang a. “A tuartute kan tawrhpuin he thila lo tel ve zawng zawngte kan lainat hle a ni,” an ti.