Lung lam natna avanga inkhelh laklawh laia tlua thi zui ta sawi tur an awm zauh zauh tawh a, Inrinni kalta khan chutiang vanduaina chu Albania rama league match an khelh laiin a thleng leh a, Ghana striker Raphael Dwamena chu kum 28 mi lek niin khelmual chhungah lungphu chawlin a thi.
League match khela Egnatia leh Partizani inhmachhawn laiin Albanian league season kal meka Egnatia tan goal kua thuna league top scorer ni mek Dwamena hi khelmualah a tlu a, Albanian Football Federation (AFL) thuchhuahin a tarlan danin, specialist doctor-te’n bawisawm zu nghal mah se a nunna an chhan zo ta lo a ni.
Kha vanduaina thlen hnu khan AFL lam chuan team pahnih inhmachhawn lai chu a titawp hlen a; kartawpa Albania rama inkhel tur zawng zawng pawh a thulhtir (post-pone) nghal bawk.
Federation hian Dwamena chhungte leh Egnatia club a tawrhpui thu tichhuakin, kha vanduaina khan Albanian football community a barakhaih takzet tih an sawi.
Ghana Football Association (GFA) pawhin thuchhuah siam ve nghalin, ram tan game kua khela goal hnih thun tling tawh an forward chhungte an tawrh-pui thu leh hun harsa tak an hmachhawn mek laiin an kiangah an ding reng tih an sawi a; Raphael Dwamena chu ram tana tha taka hna thawktu leh Ghana tana a khelh tawha class taka inlan thin a nih thu GFA president Kurt Edwin Simeon Okraku chuan thuchhuah siamin a tarlang.
A club hlui pahnih Levante leh Zaragoza pawhin social media kaltlangin tawrhpuina thu an tarchhuak ve bawk.
Dwamena hian Red Bull Salzburg-ah youth player ni chungin a career a tan a; Albanian club a zawm hma hian FC Zurich, Levante leh Real Zaragoza thuam a lo inbel tawh bawk.
Kum 2017 khan England lam a hawi a, Brighton-in pound maktaduai 14-a lakluh an tum laiin medical a paltlang zo ta tlat lo a; La Liga lamah Levante tan a inlan ta zawk a, he hmun atang hian loan-in Zaragoza lamah a chhuak nghe nghe.
Kum 2021 khan khatih laia a team vawn Blau-Weiss Linz leh Hartberg-te’n Austria rama cup match an khelh laiin khelmualah bawk a lo tlu tawh a, mahse, ngai awh chho lehin a playing career a chhunzawm leh a; an sawi danin a lung zai a ni tawh a, a lungah khawl (automatic defibrillator) an vuah niin an sawi!
Ghana striker tluhlum!
