Global music sales 10%-in a pung
Kum khat (2023) chhunga khawvela huapa music sales chuan dollar tluklehdingawn 28.6 a tling a, hei hi 1999-a khawvel huapa rimawi lama kum khat chhunga sum chevel an belhkhawm thin atanga a tam ber tum a la ni a, paid streaming subscription pawhin a vawi khat nan subscriber maktaduai 500 a pel ve ta bawk. Tihian, tun kum 9 chhung chu khawvel hmun hrang hrangah rimawi hralhna hian pun lam a la pan ta zel niin International Federation of the Phonographic Industry (IFPI) Global Music Report 2024 chuan a tarlang.
2023 chhunga music sales hi dollar tluklehdingawn 28.6 niin, chu chu a kum hmasa, 2022 aiin 10%-in a pung a, kum khat chhunga a punna rate sang ber dawttu a la ni. Kum hmasa aia a punna rate san ber tum chu 2021 kha niin, 2020 nena khai khinin 2021-ah hian 18.5%-in a pung.
IFPI hian global music revenue chu 1999 atangin a lakhawm tan a, an lak khawm hmasak ber hian dollar tluklehdingawn 22.2 a tling a, mahse, piracy leh physical sales tlakhniam avangin global music sales hian 2014 khan a hniam ber lai tawngin, hemi kum a music sales chu dollar tluklehdingawn 13 chiah a ni.
Streaming lama sum chevel a pung sawt hle a, 2023-a paid streaming subscription revenue hi dollar tluklehdingawn 14 a tling a, chu chu global music sales atanga 48.9% a ni pha hial a ni. Global paid streaming revenue a punna chhan pakhat chu streaming service lian zual Spotify, Apple Music, Amazon Music, YouTube Music leh Deezer ten an subscription man an tihpun vang a ni pakhat a, kum 10 chuang hnua an tihpun vawi khatna a ni.
Music streaming subscription man hi a pung nain subscriber an pung telh telh tho a, IFPI report-ah chuan streaming service hrang hranga paid subscription hian a vawi khat nan maktaduai 500 a pel ta a, tunah hian khawvel huapa paid subscription account hmangtu mi subscriber maktaduai 667 chuang an tling tawh niin an tarlang bawk.
Global music sales 10%-in a pung
