Goal 43, red card panga leh penalty vawi ruk!
Thawhehni zan Champions League football zet chu a boruak a sang ker mai a, league stage match kua kan thlirliam takah khan insawpna lian pui pui hmuh tur awmin, a thupuia kan chhawpchhuah ang hian red card pawh tum nga ngawt phawrh a ni!
Season liamta champion Paris St-Germain chuan Germany ramah 7-2 tehrengin mualneitu Bayer Leverkusen an sawp a; he inkhelah hian team pahnihin player pakhat ve ve red card avangin an hloh a; German club tana Alejandro Grimaldo spot-kick chhuihlut lo lai hmuh tur a awm bawk.
PSV Eindhoven chuan sikhat phur hmasa zet chungin Italian champions Napoli chu 6-2 ngawtin an vel a; Thawhlehni zana Premier League club pathum inlan – Arsenal, Newcastle United leh Manchester City-te’n an tumpui hneh vekin, away game chang chhun City tana goal khungtu pakhat zawk Erling Haaland chuan a zawn zatin game 12 chhung goal a khung tling ta!
Match kua kan thlirliam takah khan goal 43 tehreng kan hmuh bakah drama chi hrang hrang pawh hmuh tur awm bawkin, Europe khawmualpuia club tournament ngaihhlut hlawh ber tih takah khawi game pawh kha thlir a manhla e!
Tun Thawhlehni zan ang reng renga goal lut tam kha Champions League khelh zanah tunhma lamin tum hnih chiah a la thleng a; a pakhat zawk chu season liamta league phase final round khelh zana goal 64 lut ka niin, kha kha Champions League zan khat thil thua goal luh hnem ber record a ni zui ta nghe nghe.
Ve bawkin, kha mi tum khan game khelh tur awm zawng zawng game 18 chu zan khata khelh zawh vek niin, game khata goal lut chawhrual (goals-per-game average) chu goal 3.55 a ni.
Kum 1997 October ni 1 zan khan game 12 khelhah goal 44 zet lut tlingin, Paul Scholes leh Zinedine Zidane pawh scoresheet-a lang zingah an tel a, khawvela midfielder ropui pahnihin goal an thun zan khan Manchester United chuan Old Trafford-a an mikhual Juventus lakah 3-2 hnehna an chang.
Tun Thawhlehni zan bika goal-per-games average kha a tha hle a, kha aia tha chu vawi khat chiah hmuh tur awmin, chu chu kum 11 liamta kum 2014 October ni 21 zana game riat lek khelh atanga goal 40 tehreng a luh tum kha niin, game tina goal nga zel lut anga chhut chhuah theih a ni hem mai!
Kha mi zan khan sihnih ve ve thuna Manchester City leh CSKA Moscow inhnehtawk tumin Sergio Aguero leh James Milner-te’n English club tan goal khat ve ve an thawh nghe nghe.
Kha mi zan vek khan Chelsea chuan Maribor lakah goal ruk khungin, Bayern Munich leh Shakhtar Donetsk pawhin an tumpui Roma leh Belarusian club Bate Borisov lakah goal arih ve ve an puitlin!
Tun Thawhlehni zan ve thung khan English club-te’n Champions League Thawhlehni zan bika an goal khung hnem ber hun an nghakchhuak a, Premier League club pathumte goal thun belhkhawm kha goal kua tlingin, a ram ang zawng chuan France-in an la thawhhlawk zawk a, Ligue 1 club inlan awmchhun Paris St-Germain chuan goal sarih ngawt an thun tling a nih kha!
Goal tilut zo ve lo awmchhunte chu – Union Saint-Gilloise (Belgium), Benfica (Portugal), Kairat (Kazakhstan) leh Pafos (Cyprus)-te an ni.
Thawhlehni zan scoresheet-ah khan English player-te atangin goal nga a lut a; chu’ng zingah chuan Barcelona star Marcus Rashford leh Newcastle player Harvey Barnes-te’n goal hnih ve ve thawhin, Anthony Gordon chuan Magpies tan goal khat a thun ve bawk.
Spanish player-te chu goal thawh hnem ber niin, Barcelona hat-trick hero Fermin Lopez chuan Spain ram atanga chechhuak atang goal uk luyt zinga a chanve a thawh!
Thawhlehni UEFA Champions League
League Stage result
Barcelona 6-1 Olympiakos
Kairat 0-0 Pafos
Arsenal 4-0 Atletico Madrid
Bayer Leverkusen 2-7
Paris Saint-Germain
Copenhagen 2-4
Borussia Dortmund
Newcastle United 3-0 Benfica
PSV 6-2 Napoli
Union Saint-Gilloise
0-4 Inter Milan
Villarreal 0-2 Manchester City