Site icon The Aizawl Post

Goal nga nena a team chakpuitu Mbappe

Thawhtanni zan French Cup inkhelah Paris Saint Germain chuan 7-0 tehrenga mualneitu leh sixth-tier club ni bawk Pays de Cassel sawp chungin last 16 an lut a; heti zat goal-ah hian forward Kylian Mbappe chuan goal nga a thawh!
Kum 2017-a Monaco atanga an sengluh fuh zet Mbappe hian PSG thuam inbel chungin French Coup de France title hi vawithum la tawhin, kumin pawh hian a khelhna club hi champion tura rinkai ber an ni leh mek.

France striker Mbappe hian first half-ah goal thum thun hmanin, second half-ah goal hnih dang a thawh belh a; season kal lai inelna hrang hrangah belhkhawmin goal 23 a khawl tling leh der tawh!
Spanish football inkhaidiat thlak dana a parukna daih luahtu Pays de Cassel hian last 32 lut turin match thum an chak a; Ligue 1 giants lakah pawh darkar chanve dawn an lama goal lut tur an humhim thei a, mahse, minute 29-ah Mbappe an dangbet zo ta ngang lo a ni.

Nikum December thla World Cup final-a Argentina an hneh loh tuma hat-trick a siam hnuah France forward Mbappe hian inelna hrang hrangah game li khel leh tawhin, goal ruk a thun tling chiah a, PSG tana game khata goal nga tilut tling hmasaber a ni bawk.

PSG goal hnih dang hi Neymar leh Carlos Soler-te thun niin, round of 16 lamah top flight club ve bawk Marseille nen quarter-final luh an inchuh leh ang.

Thawhanni zan inkhelah Lionel Messi a inlan lo a, PSG-in an record kawl lai belhchhaha French Cup title 14 lak tlin an tumna kal mekah Mbappe leh Neymar chuan hun pumin an khel tluan ve ve thung.

Exit mobile version