Football-ah Europe-a rawlthar tha ber thlan thin a ni a, kum 21 chin hnuai lama player tha ber an thlan chu ‘Golden Boy’ tih a ni. Golden boy 2023 a thlan theih tura chhawp chhuah a ni a. Chhawpchhuah zinga langsar zual kan tarlang ang.
Golden boy 2023 chawimawina dawng thei tur zinga chhawpchhuah singah England leh Real Madrid midfielder Jude Bellingham chu rinkai ber zingah a tel. Bellingham hian German club lian Borussia Dortmund atangin La Laiga club lian Real Madrid a zawm a. A club thar Real Madrid tan a che tha nghal hle. Thawhtan zinga AC Milan an lehthal tumin Bellingham hi Real Madrid tan a khel tha nghal hle. England player pawimawh a ni chho der tawh bawk a, Golden boy 2023 chawimawina dawng turin rin a kai hle.
Barcelona leh Spain rawlthar Gavi chu Golden Boy 2023 chawimawina dawng thei tura chhawpchhuah zingah Jude Bellingham elpui lian ber tura ngaih a ni. Gavi hian Barcelona tan inelna hrang hrangah vawi 99 khelin, goal 5 a thun der tawh. Spain player pawimawh a ni tan der tawh bawk a, Spain tan hian vawi 23 khelin, goal thum a thun tawh bawk.
Bellingham leh Gavi baka hming langsar dang chu Bayern Munich playmaker leh Germany international Jamal Musiala a ni. Chelsea atanga Bayern Munich zawm Musiala hian German champion tan inelna hrang hrangah vawi 135 zet a khel tawh a, goal 33i a thun tling tawh bawk. Kum 2021 atang khan Germany national team tan a khel tan a, vawi 23 khelin, goal khat a thun tawh.
Europe-a rawlthar tha zual 10 zingah RB Leipzig-ah loan a khel Paris Saint-Germain player Xavi Simons te, Leipzig rawlthar Benjamin Sesko leh Atalanta forward Rasmus Hojlund te an tel. Manchester United in lak tuma an hel mek Hojlund hian Atalanta tan inelna hrang hrangah vawi 34 khelin goal 10 a thun tawh. Denmar tan tha takin bul a tan a, Denmark tan hian kum 2022 atangin a khel tan a, vawi ruk khelin, goal ruk a thun der tawh a, Denmark inngahna lian a ni chho thuai dawn. Hojlund hian United zawm a duh a, United pawhin lak ngei an duh bawk a, Atalanta nen man leh mualah inremna an la nei thei rih lo thung.
Golden boy 2023 a thlan theih tur zingah Hojlund hming a rik rin rualin Manchester United leh Argentina rawlthar duhawm Alejandro Garnacho hming a lang tel bawk. Golden boy 2023 chawimawina dawng tura chhawpchhuah zingah hian Liverpool rawlthar duhawm Harvey Elliott leh Stefan Bajcetic te an tel a. Manchester City rawlthar pahnih Rico Lewis leh Maximo Perrone te an tel bawk.
Golden Boy chawimawina hi Italian chanchinbu Tuttosport buatsaihin kum 2003 atanga sem tan a ni a. He chawimawina dawng hmasa ber chu Rafael van der Vaart niin Barcelona rawlthar Gavi chu he chawimawina dawng hnuhnung ber a ni ve thung. Chawimawina dawng tur hi chanchinbu mite thlan niin heng; Tuttosport (Italy), Bild (Germany), Blick (Switzerland), A Bola (Portugal), l’Équipe (France), France Football (France), Marca (Spain), Mundo Deportivo (Spain), Ta Nea (Greece), Sport Express (Russia), De Telegraaf (Netherlands) leh The Times (United Kingdom) aiawhte thlan a ni. Hen news paper hrang hrangte hian chawimawina dawng tlaka an ngaih panga theuh thawh thin. Chung an chhawpchhuah zing atang chuan chawimawina dawng tur thlan leh thin an ni.
Golden boy award dawng tawh zingah Lionel Messi, Kylian Mbappe, Wayne Rooney leh Erling Haaland te chu a langsar zual an ni.
Golden Boy 2023 dawng tura rinkai zualte
