Mizoram Gorkha Youth Association (Central) huaihawtin Gorkha ho zinga thu leh hla lama puipa bera an ngaih Adikavi Bhanubhakta Acharya pian champha vawi 210-na ‘Bhanu Jayanti’ chu Inrinni khan Aizawl bakah Mizoram hmun dangah lawm a ni.
MGYA (Central) chuan Aizawlah hmangin, hmanpui tura sawm Hospital & Medical Education director kalchhuak Dr K K Chhetri chuan Gorkha thangtharte zingah mahni pianpui tawng thiam lo an awm tawh chu veiawm a tih thu sawiin, nu leh paten an fate chu khawi hmunah pawh awm se, mahni tawng an zir leh thiam tir chu an mawhphurhna lian ber zing ami a ni tih hre thar turin a chah.
He hunah hian Gorkha hnam lam chi hrang hrang entir a nih bakah zirlai titha chawimawi an ni a. He Ni pual hian kar kalta khan Nepali Middle School Khatla-ah Adikavi Bhanubhakta Acharya Thu leh Hla phuahte bakah thu leh hla lama tuimiten an thuziak phochhuah a ni a; thangtharten Gorkha hnam ziarang leh an pipute hnutchhiah thu leh hla lama an hausakna puangzarin, chawimawina leh Kavi Gosthi (seminar) neih a ni. Zirlaite tan essay leh sketching intihsiak huaihawt a ni bawk.
Adikavi Bhanubhakta Acharya hi Nepal ram Tanahu district-a Chundi Ramgha khuaah kum 1814 khan a piang a. Puithiam chhungkua an nih avangin a hranpain sikul kal lo mah se, a pa zirtirna avangin ziak leh chhiar lamah a thleng sang hle. Thu leh hlaah hnutchhiah tam tak a nei a, khawvelin a hriat lar chhan ber erawh Hindu sakhaw lehkhabu thianghlim, ‘Ramayana’ chu Sanskrit tawng harsa tak atangin Nepali tawnga a lehlin vang a ni. Amah hi Gorkha hnahthlak hnam hrang hrangte inkara inpumkhatna siamtua ngaih a ni bawk. Kum 1868 khan a thi a ni.
MGYA hi Mizoram-a Gorkhae pawl lian ber niin 1976-a din a ni a. Aizawl khawpui chhungah branch 12 leh Aizawl pawn lamah Sub-Hqrs 1 (Kolasib) leh Branch 5 an nei a, member 4500 vel an awm a ni. Bhanu Jayanti pawh hi Inrinni vek khan Kolasib, Vairengte leh Bualpuiah MGYA Branch ten an buatsaih a ni.
Gorkha-ten Bhanu Jayanti lawm
