Govinda silaiin a inkap palh
Actor leh politician, a vanglaia Bollywood star lar berte zinga mi Govinda chu nimin zing khan a revolver-in a ke-ah a inkap palh a, damdawi inah enkawl mek a ni.
Govinda manager Shashi Sinha cuan Govinda hi Kolkata pana chhuak tur a ni a, license neia a kawl, a revolver chu a tihfai laiin a thlauh palh a, silai chu puakin, a keah a inkap palh ta niin a sawi. He thil thlen hun hi nimin zing dar 4:45 vel kha a ni.
Govinda hi a chenna bul lawka Criticare hospital, Juhu-ah kalpui nghal a ni a, a keah hian hliam a nei nual a, thisen pawh a chhuak nasa niin an tarlang a, mahse, doctor ten silaimu hi phawrh tawhin, damdawi inah a la awm mek a ni.
He thil thlen lai hian a nupui Sunita chu Kolkata lamah a awm a, ani pawhin hmanhmawh takin Mumbai a pan ve nghal a ni. Govinda pawhin voice note hmangin a chanchin ngaihven tute tan thuchah a sawi thei tawh a, “Govinda ka ni e. In mi malsawmna leh ka chhungte malsawmna leh ka guru zahngaihna avangin ka lawm a ni. Kah palh ka ni a, silaimu an la chhuak tawh. Heta thawktu doctor te, a bik takin Dr. Agarwal chungah lawmthu ka sawi a, min tawngtai sakna zawng zawng avangin ka lawm e,” a ti.
He thil thlen dan hi police ten an en zui dawn a, zingkar dar 4:45 vela a silai a tifai ngawt mai hian zawhna a titam hle a ni.
Govinda hian hmanni lawk khan politics luhchilh ve tanin, Maharastra CM Eknath Shinde party, Shiv Sena a zawm tawh a ni.
Govinda silaiin a inkap palh
