Daily Newspaper

GRAMMAR PAWIMAWHNA

(Tawng hian grammar chu a lo pianpui tak meuh em?)

155

Maenga Kawlni, MGS

“Tawng hian grammar a pianpui nghál tih erawh khawvelin a hre chhuak tlãi thung.” Peter LT Kima (JF Junior)

A sawi huai kan ti mah mah em?
Kum 30 chuang mah tawng leh a kaihhnawih chungchang lo tuipui tawh leh tun thlenga thu ziah leh lehlin lama ei zawng hian kei ai chuan a hre turah ka han ngai ve ngawt chu a nia! Mahni phak tawk lekin i han bih zui ve teh ang:

Grammar chu eng nge?
Grammar hrilh fiahna zawng zawng chu kan tar lang seng hauh lo a; mahse, Oxford dictionary-in a hrilh fiahna tal hi ka’n tar lang ang e. Hei hian grammar zung a hrut thuk deuh.

The whole system and structure of a language or of languages in general, usually taken as consisting of syntax and morphology (including inflections) and sometimes also phonology and semantics.

A awmzia nia ka hriat dan:
Grammar chuan tawng hlawm pumpui leh a inrel dan (whole system and structure) te, thu inchheh rem dan (syntax) leh thumal lo pian chhuah dan leh danglam dan chhuina (morphology) te a huam a, a chang chuan a lam dan leh a awmzia thlengin a huam a ni.

Grammar tih hming a lo pian hma daih hian thil hming eng pawh lo phuah mah se chu hming chu grammar hian a huam nghal tlat asin.

JF-a phei chuan, “Kan pi leh pute khan grammar dan an bawh chhe meuh lo,” a ti a, “An Duhlian tawng grammar lo thiam kha khawvel hnampui zawng zawngte grammar dik tak ang vek hi a ni e,” a ti. Grammar rules erawh chu a hranpain an hre lo tih a lang a, a takin an hmang thung a ni.

Merriam Webster Dictionary-in hrilh fiah dan: a system of rules that defines the (grammatical) structure of a language.

Tawng inrelbawl dan (a inrel dan kan ti zawk dawn nge) kha grammar-in a huam tawh a, chumi hnuah a inrelbawl dan (structure) hrilh fiahna tura ‘system of rules’ kha grammar a ni leh bawk a ni tih kan hmuh leh a ni.

A inrelbawl dan (structure) tel miah lovin tawng ringawt hi lo piang ni se chuan tawng hian grammar a pianpui tih rual a ni lo ang. Tunah erawh chuan a inrelbawl dan leh chumi zuk hrilh fiah lehchhawnna thlengin a huam a ni tih kan hre thei awm e.

Tuna kan zir nasat tak ber leh grammar kan tiha kan ngaihtuahnaa awm ta ber chu tawng inrelbawl dan ZIRNA lam hi a ni ta a ni. |awng inrel dan (structure) hrilh fiahna atana ‘system of rules’ (Merriam Webster sawi khi) hi systematic takin kan zir ta a, hei hi Mizo tawngah ngat phei chuan kei leh mi thenkhat chuan kan la thiam tawk lo hle tih hi ka sawi tel duh nghe nghe. (Sap tawngah pawh ka thiam teh chiam chuang hlei lo va.) Kan Mizo tawng inrelbawl dan (a ziah dan pawh huamin)-ah hian ‘system of rules’ fel tak erawh chu a awm a, chu chuan PoS te, grammar term dang leh thil dang dang a kaihhnawih teuh a, Sap tawng nen chuan a danglam hle bawk a, zir ka ngai nasa hlein ka inhria a ni. System mumal a awm lo (systematic a awm lo hrim hrim) a, a hun laia a hmangtu tam ber hman dan hi a dik mai, ti ang zawnga min hrilh thin an awm phei chuan pawi ka ti hle thin a, tawng zirna chungchanga hma sawnna daltu zinga pakhat ni hialin ka hria a ni.

Collindictionary.com chuan hetiang hian a sawi a: Thumal eng emaw zatin sentence a siam a, grammar chuan chung thumal inrem khawm dan chu a sawi fiah thung a, sentence-a thumal tinte chu a hman dan azirin hlawm/pawl hrang hrang hrangah then an ni leh a, chutianga pawl (class)-a thente chu parts of speech hi an ni. (Sentences are made up of words. A sentence can be made up of any number of words. Grammar describes how we put words together. Each word in a sentence belongs to a particular set or class, depending on how it is used. These classes are called parts of speech.)

Heta tanga lo lang chiang ta em em chu thumal tinte hi grammar-a an nihna anpui/tlukpui hmangin a ni part of speech-ah then an nih. Grammar chuan engtia rem khawm tur nge tih a sawi nghal bawk (grammar describes how we put words together). Thumal tinte hi part of speech-a then an nih dan leh sentence-a rem khawm an nih dan hi grammar-a an nihnaah a innghat a ni tih chiang takin kan hre ta a ni.

Oxford Advanced Learner’s Dictionary chuan hetiang hian a sawi nghe nghe: Grammar-a an nihna ang zela thumal hrang hrangte a hlawma thenna hi part of speech chu a ni (one of the classes into which words are divided according to their grammar, such as noun, verb, adjective, etc.)

Tichuan:

1. Thumal tinte hi PoS-a then an nih dan chu grammar-a an nihnaah a innghat.

2. Grammar chuan thumalte sentence-a rem khawm an nih dan a sawi fiah.

Thumal tinte chu grammar-a an nihna hmangin PoS-ah then an ni a, grammar-a an nihna hmang bawkin sentence-ah awmze neia rem khawm a ni bawk. A tawi zawngin, PoS-a an nihna hmangin sentence-a an awmna tur dik takah awmze neiin thumal kan rem khawm ta a ni. Thumalte hi grammar-a an nihna hmangin part of speech-ah kan then a, grammar rules (systematic rules) hmang bawkin sentence-ah kan rem khawm a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy