Site icon The Aizawl Post

Grammy 2025-ah Kendrick Lamar a langsar Beyonce’n album of the year a dawng; Taylor Swift kut ruakin a haw

Grammy 2025-ah Kendrick Lamar a langsar
Beyonce’n album of the year a dawng; Taylor Swift kut ruakin a haw
Rimawi khawvel tana zan ropui ber an tih thin Grammy Awards chu kumin atan an rama Pathianni zan, keini tana Thawhtanni tuk khan Crypto.com Arena, Los Angeles-ah an sem ta a, 67th Annual Grammy-ah hian rapper Kendrick Lamar a langsar ber a, award panga dawngin, chung zingah chuan award ngaihhlut zual, Big Four category an tih zinga category pahnihah award a dawng tel. Beyonce pawhin record siamin award a hum haw ve leh nual a, chung zingah chuan Big Four category atangin album of the year. Hetihlai hian nikum lama rimawi khawvela thawm lian ber ni tluan chhuak zak Taylor Swift chuan nomination a nei nual nain, award pakhatmah a dawng lo tlat.
Kendrick Lamar hi Super Bowl Halftime show headline tur a ni bawk a, Grammy-ah a che tha bawk nen a kum bul tan dawn a fuh dawn riau. Nikuma a hla hit ‘Not Like Us’ chuan record of the year leh song of te year a dawng a, he hla hi Drake a kahna hla kha a ni. A award dawn hi an khua, Los Angeles tan a hlan a ni.
Beyonce’n a vawi khat nan ‘Album of the Year’ a dawng a, he album a country project ‘Cowboy Carter’ avanga dawng niin, a hmain tum li he category-ah hian nominate lo ni tawhin, ‘I Am…Sasha Fierce,’ ‘Beyonce’, ‘Lemonade’ leh ‘Renaissance’ ten album of the year hi an dawng pha lo vek a, a tum nganaa Beyonce a vannei ta a ni. Beyonce hian country album a vawi khat siamna niin, a hlawhtlinpui nghal viau e.
Kumin Grammy hi comedian Trevor Noah-a’n a host a, a zawna tum ngah a host-na a ni tawh. Kumin Grammy nomination-ah Beyonce a langsar ber a, nomination 11 a nei a, award a dawn belh leh nual a, chung zingah chuan Best Country Album a tel a, mihang hmeichhe zinga tun kum 50 chhunga country music category a award dawng thei hmasa ber a ni.

Exit mobile version