|um 29 zet a beih hnua Grand Slam third round la pel zo ngai lo Polish world number 45 Magda Linette chuan nimin khan 6-3 7-5-a Czech two-time major finalist Karolina Pliskova hnehin Australian Open hmeichhe singles semi-final a lut a, kum 30 mi hi Melbourne Park-a tournament kal laiah hian a tumkhatna atana Grand Slam quarter-final lut thei zinga upat lama pakuana a lo ni tawh a, a mumang duhawm kal mek chu Rod Laver Arena-ah a chhunzawm leh ta a ni.
Linette hian nimin hmeichhe singles quarter-final inkhel danga Be-larusian fifth seed Aryna Sabalenka leh Croatian Donna Vekic chak zawk zawk chu Inrinni final lut tur zawnna lamah a hmachhawn leh ang.
Sabalenka leh Vekic pawh hi Poland star Linette ang bawka a tumkhatna’na Australian Open quarter-final khel an ni.
Chak tura rinkai lo zawk ni chunga grand slam tournament final vawihnih khel tawh Czech Republic star Pliskova a hneh mai kha Poland nula Linette chuan awih harsa a tih thu inkhelh banah sawiin, rilru khawih hnehna a nih thu leh a mangphan thin a taka lo chang ta a nih thu a sawi a, a theihnghilh tawh ngai loh tur hnehna avanga a hlim takzet thu a tarlang tel.
Melbourne Park tour-nament tan hmain Polish world number one Iga Swiatek chu champion tura mi rinkai berte zinga mi ni mah se women’s draw-ah fourth round paltlang zo lo zawngin a tla ringawt a, mi rin loh zawk Pole dang Linette zawkin world number one hlui Pliskova hnehin last four a lut a, Melbourne Park Grand Slam tournament kal mekah match nga a chak tling tawh.