Great White frontman \hin Jack Russell a thi

Great White frontman thin Jack Russell a thi
Kum 40 ral kai tawh ho chuan ‘Once Bitten Twice Shy’ hla kha kan hre fur ang, kha hla satu Jack Russell leh an band Great White te pawh an sawi takah chuan kan hrechhuak thar leh thei ngei ang, 1980s le 90s glam rocker, an vanglaia keini ramah pawh kan lo hmelhriat leh an hla kan lo tuipui ve em em thin kha. Tichuan, vanduaithlak takin Jack Russell thih thu puan a ngai ta tlat mai. Kum 63 mi niin August ni 15, 2024 khan a thi.
An group Great White hi 2001 khan an tiltiak tawh nain, Great White pualin Instagram page an la nei reng a, a boral thu pawh Instagram-ah hian an puang a, an thuchhuah chuan, “Lungchhe tak chungin kan hmangaih Jack Patrick Russell mual liam thu puan a ngai ta,” tiin an tarlang a, Russell hi a hun tawpah hian a nupui Heather Ann leh a fapa Matthew Hucko bakah an chhungkhat laina leh thian tha ten an dawm hlum niin an tarlang tel a, “Jack hi pa fiamthu duh, nun chen thiam, rock and roll tana sawinghin rual loha thawh hlawk hi engtikah mah a hming a dai leh tawh lovang,” an ti bawk.
A kalsan tak chhungkaw lam pawhin he hun lungchhiatthlak tak an tawh lai hian an privacy zah sak turin mipui an ngen a, Russell vui dan tur leh a hun tur te an la puan tur thu an tarlang ve bawk.
Great White Instagram page-ah chuan Russell-a original bandmate-te chuan Russell an ui thu leh a chhungte an tawrhpui thu puangin, “Jack Russell-a’n a kalsan tak a chhungte kan tawrhpui takzet. Jack-a aw ropui tak hi chatuanin a nung reng tawh dawn tih hriatnain a thlamuan ve deuh kan beisei. Rock khawvela champion ropui berte zinga mi, Muangin Chal Ang Che,” an ti bawk.
Great White hi 80s leh 90s kum hmasa lam kha an lar vanglai niin, Billboard Hot 100 (singles) chart a lang thei hla paruk an nei a, chung zingah chuan ‘Once Bitten Twice Shy’ hi a lar berte zinga mi niin, 1989 khan chart No.5 a kai a, MTV lamah pawh a music video a chhuak ngun tlauh tlauh khawp mai.
An group hi 2001 khan an kehdarh ta a, an lead singer hian Jack Russell’s Great White tiin ama pualin a chhawm nung ta zel a, hmun hrang hrangah show neiin, chung zingah chuan 2003-a Rhode Island-a The Station nightclub-a show an neih tuma kangmei chhuak avanga mi 100 lai an thihna chu a chhelar ta hle a, he kangmei chhuak avanga nunna chan zingah hian a bandmate Ty Longley pawh a tel a, midang 230 chuangin hliam an tuar bawk. He kangmei chhuak avang hian Russell-a tour manager Daniel Biechele chu court-in thiam loh chantirin jail bang a zût phah a, band pawhin khingtu an ngah phah hle a ni.
Jack Russell hian thla kalta mai khan Lewy Body Dementia leh Multiple System Atrophy natna a neih avanga tour a bansan tawh tur thu a puang a, a chawlh tur thu a puannaah hian, “Ka duh ang leh in phu tawkin ka perform thei tawh lova, hriatreng tawh tur hun tam tak, hmangaihna leh support ka dawn te avanga ka lawmna hi thu a sawi chhuah vek sen pawh a ni lo. Ka suangtuahna min tihpuitlin sak avangin ka lawm e. Ka nun ka nuamtu in ni,” a ti. Russell ian a canchin ziahna ‘The True Tale of Mista Bone: A Rock and Roll Narrative’ a tichhuak bawk.
Jack Russell hia Mintebello, California a piang niin, 1982 khan Mark Kendall nen Great White band an din a, album pawh an nei nual a, chung zingah cuan 1987-a an album ‘Once Bitten,’ leh 1989-a an album ‘Twice Shy’ te chu hriat hlawh zual an ni. Kendall hian 2000 kan Great White atanga a chawlh thu a puang a, Russell pawh 2001-ah an band chu an tihtawp thu puangin solo lamah a kal zuai a, mahse, a hlawhtling lem lo. 2006-ah an group hi an tilkhawm lehnain eng an ang zui ta lo va, 2009-a an tawpsan leh ta a, Russell hi ‘Jack Russell’s Great White’ tih band hmingin a tour zui ta a ni.