Green Mizoram Day 2025 chu Nilaini khan Mizoram pumah hman a ni a. A hmanna pui ber Thenzawl Golf Course-ah neih a ni. Kumin thupui chu “Ruahtui khawlnan thing i phun ang u” tih a ni. Hmanpuitu Environment, Forests & Climate Change minister Lalthansanga chuan Mizoramah ramngaw kan tihchereu nasat avangin tui hna a tlem tial tial a, kan pi leh puten sik leh sa an thliar dan pawh tunah chuan hman hleihtheih a ni ta lo, tiin, “Hei hi neitu thinlung pu loa, mikhual ang maia kan ramngaw kan enkawl vang a ni,” a ti.
Thing leh mau leh nungcha humhalh a, thingphun uar a, bawlhhlawh paih dan fimkhur turin mipui a chah.
Forest hotute chuan Mizoram chu India rama forest cover sanna la ni zawm zel mah se, thing leh mau quality tha zawk, sik leh sa leh tuihna siam thei zawk phun uar kan mamawh tih an sawi a. Thingphun chu tun mai ni lo, hun lo kal zel atana pawh malsawmna dawnna tur a ni tih an sawi.
Minister hian kangmei ven kawnga district tithate hnenah lawmman a hlan a. District level-ah pakhatna Lungei district niin, pahnihna Serchhip district leh pathumna Aizawl district an ni.
Ramsa leh nungcha humhalh kawnga thawk tha leh Mizorama thing leh mau tipung tura titha pawl hrang hrang hnenah lawmman sem a ni a. YMA Zuchhip Khawzawl, Sairep Village Community Lunglei district leh Sub Hqrs YMA Serchhip ten sumfai Rs. 83000 theuh bakah waiting shed sakna tur an dawng.
Green Mizoram Day hi Green Aizawl Day tia bultan a ni a, kum 1999-ah Green Mizoram Day tia thlak a ni. Kum 2014 atang khan June 11 hi Green Mizoram Day atan Mizoram sawrkarin a puang a. He ni denchhen hian Mizoram hmun hrang hrangah thingtiak phun thin niin, thingtiak nuai 46 chuang phun a ni tawh.
State Level Sub-Committee on Green Mizoram Day-in a lo rel tawh angin, kumin hian Mizoram state tree – Herhse phun uar deuh bik a ni. District headquarters tinah hman a ni a, thing tiak phun a nih bakah kangmei ven kawnga titha khua hnenah lawmman hlan a ni.
Green Mizoram Day hmang Kangmei veng tha ber Lunglei
