Nimin khan forest minister hovin Green Mizoram Day (GMD) hman dan tur rel a ni a, thupui atana an thlan chu “Thing hi rangkachak anga hlu, nunna tinreng bul a ni” (Trees are green gold; the roots of all life) tih a ni. Nikum khan GMD thupui atan “Plant trees and catch the rain,” (ruahtui tam nan thing phun rawh) tih hman a lo ni tawh bawk.
GMD thupui hi a tha thei thin hle a, mahse thingtlang loneih vang hian kan thupui bawhchhe zawngin kan kal ngar ngar thung si. Development thil avanga construction hrang hrangin ramngaw a tihchhiat dan chu lo dahtha rih ta ila.
Kum tina thingtlang loneih avanga ramngaw kan hal chhiat zau zawng hi square kilometer 350-400 vel anga chhut a ni a. Chutih laiin GMD kan hman kum 28 chhung (1999-2026)-a thingtiak phun tawh zat hi nikum GMD report ang chuan Nuai 46 a tling tawh a, chawhrualin kum tin thingtiak nuai 1.6 phun ziah ang kan ni.
Thingtiak phunte hi thi lovin nung tha vek pawh ni se, kum 28 chhunga Green Mizoram Day denchhena thingtiak Nuai 46 phun hian, kum khat chhunga thingtlang loneih avanga ramngaw kan hal chhiat zau zawng zaa 6-7 (6-7%) vel chauh a tuam (cover) pha lek chauh dawn a; thingtiak hi feet 10 dan zela phun anga chhutin. Loneihnaa thing leh mau kan tihchhiat hi chu feet 10 kar dana to an ni lo tih chu kan hre vek awm e!
Thingtlang lo atana hman hnu hi khawih chhiat zui tawh loh chuan kum 10 vel hnuah, ngai awh tawh chiah lo mah se, a lo hring tha leh mai thin nia sawi a ni a. Tun anga thingtlang loneih hi kan kalpui reng a nih chuan, tun atanga kum 100 velah chuan kan ram hi a kawlh viau tawh dawn niin mithiamte chuan an chhut a ni.
Thingtiak hi chu a theih chhung chu i phun zel ang u, a enkawl zui kawngah pawh awmze neiin i kalpui zel ang u. Chutih rual chuan, sum leh pai tha leh zung heti zat seng reng chung sia a lehlamah jhuming avanga kan thingphun let za tam tak kan tichhe reng zel a nih chuan, GMD kan hahpuina hian awmzia a nei chau hle dawn tihna a ni.
Kum tina thing tiak phun belh tam lam aiin, kum tina thing ding sa humhalh tam lamah hian tan kan lak nasat a tul zawk. “Kum khat chhungin thingtiak chuti zat chu kan phun” tih aiin, “Kum khat chhungin thingtlang loneih chuti zat chuan a tlahniam” tih hi ‘Trees are green gold, the roots of all life’ tih thupui nen pawh a inhmeh thuk zawk ngei ang.
Green Mizoram Day leh a behbawm
