GST atanga sum lut tlahniam – MNF Thalai

Goods & Service Tax (GST) atanga Mizoramin sum a lakluh chu a hniam zawngin a kal mek tih MNF Thalai chuan an sawi.
MNF Thalai Hqrs. thuchhuak chuan, ZPM sawrkar hnu ah hmasawnna hnathawh thar leh hnathawktute bill pek a kaltluan loh avangin sawrkarin GST a dawng tha lo hle tih a sawi a. State dangte GST sum lakluh nasa taka a pun laiin, Mizoram sawrkar GST sum lakluh chu nikum aiin a thla zawnin a tlahniam tih a sawi.
July 2023-a GST-a Mizoram sum lakluh aiin July 2024-a lakluh chu -1% in a hniam a. August 2023-a GST-a sum lakluh aiin August 2024-a GST sum lakluh chu -13% in a tlem zawk tih a sawi a ni.
‘Sumdawngten sum an lakluh atangin GST an pe a; contractor leh supplier ten bill an lak atangin sawrkarah GST an chhunglut thin. ZPM sawrkarah sum chevel a tlem a, GST chhunglut ve miah lo – CM, ministers, advisers, Board chairman, VIP personal staff adt a sum hman teuh teuh rah a lo lang tan mek,’ thuchhuah chuan a ti.
Mizoramin chhiatna nasa tak a tawh laia Lungleia cabinet thutkhawm leh sawrkar sum nuai tam tak khawhral a ni tih MNF Thalai hian sawiin, ‘Kalphung thar sawrkar intite kal dan leh rorel dan hi upa in chhuanmang rorel an tih ang ngei kha a ni,’ a ti.