Daily Newspaper

GST hi tax system a ni lo, miretheite rahbehna a ni

14

Narendra Modi sorkar a beihna chunzawm zelin Congress president hlui Rahul Gandhi chuan ‘GST hi tax system a ni lo, India miretheite beihna a ni’ tiin a sawi.

Finance Minister hlui P. Chidambaram pawhin sorkar bei zui zelin sorkar in economy a tundin lehna turah rawtna paruk siamin leh economy tundin leh nana sum puk hreh lo turin a ngen bawk.

State sorkar panga te chuan Centre-in GST compensation a pek tur a pek theih loh avanga sum puk tura a tihna chungchangah lehkha an thawn a. Centre chuan State-te hnena a pek tur GST due tum hnih a pe tawh lo a ni.

Rahul Gandhi chuan GST chungchang chu unorganised economy beihna thawhhnihna a ti a. Congress kaihhruai UPA sorkar khan taxation system “one tax, minimal tax, standard and simple tax” an lo kalpui tawh thu a sawi a.

NDA sorkarin GST a kalpui dan chu thil hrang hlak a nih thu sawiin sumdawng tenau leh laihawl te chu GST slab khirh leh harsa takah an talbuai tiin a sawi a.

“Eng vangin nge rate hrang chi li a awm? Hei hi a chhan chu sorkarin thil thlak danglam mai thei te chuan GST an thlak danglam a duh a, a ti ve thei lo te chuan GST-ah engmah tih theih an nei ve lo. A nih leh chutianga thlak danglam thei tura theihna nei te chu tu te nge? India rama industrialist hausa ber ber 15-20 te an ni. Hei vang hian tax law thlak an duh apiang chu he GST regime ah hian awlsam takin an thlak mai,” tiin Gandhi chuan a sawi.

GST chu ‘hlawhchham lailet der’ tia sawi bawkin Centre berin State te hnena compensation a pek tur a pe thei lo va, hei vang hian State sorkarte chuan an hnathawh leh zirtirtute hlawh pek turah harsatna an tawk a ni a ti bawk a.

“A hlawhchham a ni saltiah mai lo, mirethei leh sumdawng tenau leh laihawl te beihna a ni a. GST hi tax system a ni lo, India miretheite beihna a ni a. Dawr nghaktute, sumdawn tenau leh laihawl te, loneitu leh inhlawhfate beihna a ni a. He beihna hi kan hriatfiaha kan dolet a ngai a ni,” tiin a sawi bawk.
Chidambaram thung chuan demand siama economy chawk nung tura tihmakmawh paruk kalpui tur a sawi thung a.

A pawimawh ber tia Chidambaram-an a sawi chu India mirethei rethei zual 50% te hnena pawisa fai pek a ni. Chungkaw tin hnenah food grain a thlawna pek tur a ni bawk a. Sorkarin infrastructure project a kalpuia sum hman tihtam a ngai a, good grain stock te chu hlawh a pawisa fai ni lova pek nan hman theih a ni a. Bank ten sum an puktir theih nan re-capitalised a ngai bawk a. A tawpna berahah chuan sorkar hian State tin te hnenah GST compensation arrear a pe nghal tur a ni, tiin Chidambaram chuan a sawi a. “Heng thilte kalpui tur chuan pawisa mamawh a ni a. Puk mai rawh u, hreh suh u,” tiin a sawi bawk.

Chidambaram chuan pawisa mamawh neih dan tur sawi bawkin, “1. Fiscal Responsibility and Budget Management Act (FRBM) norm thlahdul deuh ula kuminah sum puk tam deuh rawh u. 2. Disinvestment tichak rawh u. 3. IMF, WB, ADB tena $6.5 billion pek min huam hmang rawh u. 4. A loh theih lohah chuan deficit thenkhatte monetise mai rawh u,” tiin a sawi.

(THE AIZAWL POST – Ramchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy