GST rate thar hman leh hman loh endik

State Tax Mamit Zone chuan Zirtawpni khan Mamit khawpui chhunga GST rate thar hman leh hman loh an endik.
State Tax Mamit hi state taxation officer Caroline Laldingngheti hoin an thawkchhuak a. Mamita sumdawnna hmun hrang hrangah an kalkual. India ram puma GST rate tlakhniam hma September 17 khan survey an lo nei tawh a ni.
Mamit district chhung khaw hrang hrangah a remchan dan ang angin survey an nei a. Hemi rual hian GST registration nei pha si, la nei si lote enfiah a ni a, heng mite registration ti tura hrilh an ni. GST tax invoice neilote pawh nei ngei tura hriattir nghal an ni.
Lungleiah pawh deputy commissioner of Taxes Lalrothanga chuan GST 2.0 kalpui turah na takin GST registration drive an kalpui dawn tih a sawi a. GST ti thei reng, ti duhlote an vai uluk dawn tih a sawi. Lungleia ‘dawr lian’ tia sawi theih ho zingah GST ti lo engemawzat an awm tih sawiin, dan anga registration an ti lo a nih chuan a tlem berah Rs. 10000 an chawi a ngai dawn a, innawr leh inhrem kher ngai loin ti se, tih chu an duhdan a ni tih a sawi.
GST rate thar kalpui hian nasa takin eizawnna thar a siam dawn tih a sawi a. Lungleiah ringawt pawh sumdawng 700 vel buaipui an ngai a, tunah hian mi pakhat chauhin a enkawl a, registration ti tur leh la ti lo vai turin thalai thothang tha an mamawh a, a bikin commerce subject zirzo tawh an mamawh zual tih a sawi a ni.