GST rate tih hniam bakah rela
bungraw phurh man tlawm dawn
Goods & Service Tax rate tih hniam a nih bakah Mizorama rel a rawn luh avangin bungraw phurh man a tihlawm hle dawn tih BJP Mizoram hruaitute chuan an sawi.
Thawhlehni khan BJP Mizoram hruaituten thuthar thehdarhtute an kawm a. MLA K Hrahmo chuan Prime minister Narendra Modi-a’n GST Next Generation Reform 2.0 kalpui a nih tur thu a lo puan tawh chu September 22 atang khan ram pumah hman tan a ni tih a sawi a. Mipuiin thil kan lei reng rengin GST kan chawi tel zel thin a, dawrah kan lei emaw online-in kan chah emaw GST kan chawi a, GST 2.0 hi mipui nawlpui nitin mamawh, lei leh hralhnaah harsatna an tawh thin ti zangkhai tura hmalakna a ni tih a sawi.
“He tax rate tihhniamin a tum lian ber chu, mipui nawlpui ban phak leh man man zawka lei theih tura thil man siamthat a ni a, sumdawngten a man an tihniam ngei tur a ni,” a ti a. Old stock pawh rate thar angin an kalpui tawh tur a ni a, mipui nawlpuiin kan hriatchian a pawimawh a, a man tur dik taka bungrua leh tha (services) leia kan hralh theihna turin kan dikna chanvo kan hriat a tul tih a sawi.
BJP State vice president Malsawmtluanga chuan, GST rate hniam leh Mizorama rel lo lut chuan bungrua tam tak a titlawm dawn tih a sawi a. Rela bungraw phur chi pindan (wagon) a thil phurh man a tlawm hle a, Guwahati to Sairang bungraw phurh man chu kg. khat Rs.2 niin, Delhi to Sairang pawh kg. ah Rs.7 chauh anih avangin, by road (truck) a thil phurhna nen a intlawm hleih hle tih a sawi a ni.
BJP Mizoram State joint treasurer Lalremsangi Fanai chuan, intodelh tur chuan ram chhung siam a pun a ngai a, kan sum leh pai kan ram chhungah a kual tam a ngai a; raw material, packaging, farm goods ah chhiah lak a hniam a ngai tih a sawi. Nitin kan mamawha tax tihhniam a pawimawh a, Next Generation Reform hian tax a tihniam ta a, mi nawlpuiin kan sum hman a tlem phah anga, saving kan nei thei tawh dawn tih a sawi a ni.
GST rate tih hniam bakah rela bungraw phurh man tlawm dawn
