GST ti lo sumdawng an dapchhuak dawn

Sawrkar chuan Aizawl-a sumdawng zingah dan anga Goods & Service Tax dan hnuaia inziahluh ngai, la inziaklut lo dapchhuah beihpui thlak a tum.
Chief minister Lalduhoma kaihhruaiin Mizoram Resource Mobilisation Committee chu 2025 December 29 khan an thukhawm a, hma an lak tawh dan an thlirho.
Aizawl khawpui chhunga sumdawnna kalpuitu GST registration nei thei tura ngaih, registration la nei lo zawn chhuah hna Aizawl City Local Council Association nen tangtlanga thawh an rel a. Taxation department-in an bawhzui dawn a ni.
Taxation official-ten raid/ verification an neih changa invenna atana silai (arms) engemaw kawl an dilna chu, sawrkar laipui leh state dangte tih dan angin, a tul hunah Home department nen thawhdun dan ngaihtuah thin se, an ti.
2024 April 23-a Mizoram Resource Mobilisation Committee (MRMC) rel tawh, Mizoram sawrkar hnuaia thawk medical doctor-ten non- practicing allowance (NPA) la chunga private practice an awm chuan tihtawp nise, tia thutlukna an lo siam bawhzuina an thlir a. Health & Family Welfare department-in report a thehluh danin, sawrkar doctor 452 an awm mek a, an zinga 347-in NPA an la a, doctor 105-in an la loa, NPA la chunga private practice an awm lo a ni.
Mizoram Health Services Rules 2009 behchhana Mizoram Gazette Notification 2010 February 18 ami leh 2024 December 18-a siamthat chuan, sawrkar doctor (non clinical) private practice chu NPA an lak a khap a, private practice turte pawhin phalna an lak a ngai. Tun tum thutkhawmah hian a bawhzui zel dan tur an duang a ni.
MRMC hian Administrative Reform Commission 2019-in file-in officer dawhkan pali chauh kaltlang tura rawtna a lo siam tawh chu tlema herrem deuhin, department thenkhata enchhin turin DP&AR lama thlen an rel a. An ruahman dan chuan, department pakhatah under secretary a awm chuan deputy secretary awm lo se, deputy secretary zawk a awm chuan under secretary awm lo se, tih leh; department pakhatah joint secretary a awm chuan additional secretary awm lo se, addl. secretary zawk a awm a tul chuan joint secretary awm lo se, tih a ni. A kalpui chhinna tur department erawh DP&AR-in a ruahman ang.
Importer & exporter licence holder-ten KMMTTP kaltlanga bungraw chevela chhiah pek a nih leh nih loh endik hna thawh dan tur rawtna an thlen chu zirchian nise an tih bakah Secretariat-a e-office kalpui a nih hnua a nghawng zirchian nise, an ti bawk.