Sorkar laipui na taka sawiselin, Trinamool Congress MPs Mahua Moitra leh Derek O’Brien te chuan kum 2002 Gujarat riot leh Prime Minister Narendra Modi BBC documentary sawihlawh sorkarin a censored chu an duh lo hle.
Sorkar chuan kar kalta Zirtawpni khan social media platform Twitter leh YouTube te chu he documentary ‘India: The Modi Question’ tih chu block turin a ti a. Ministry of External Affairs chuan he documentary hi ‘propaganda piece’ tia sawiselin colonial mindset a tihsak bawk.
Twitter-in he documentary a remove sak zingah Opposition leader Derek O’Brien pawh a tel a. O’Brien leh Moitra ten documentary link an post chu paihsak an ni.
Trinamool MP Moitra chuan ‘censorship’ chu a pawm dawn loh thu a sawi a. A official handle ah documentary link a post zui a. “Khawvela democracy ram lian berin censorship a pawm nana thlan tlin ka ni lo. Hei hi a link chu a nia, in en theih chhung chu en rawh u,” tiin a sawi zui a ni.
“Censorship. Twitter-in BBC documentary ka post an paih a. Nuai chuangin an en hman a, BBC documentary hian PM in minority te a huatna a lailang a ni,” tiin O’Brien chuan a sawi bawk.
Law Minister Kiren Rijiju thung chuan he documentary hi na taka sawiselin India hmel chu ‘tihchhiat duha campaign’ in a tihmelhem lovang a ti thung.
“India-a mi \henkhatte hian colonial hangover an la nei reng a. Supreme Court of India aiin BBC an la dah sang zawk a, India zahawmna tihniamin an moral master te tilawm turin eng pawh an ti duh ang,” tiin Rijiju chuan a sawi bawk.
Centre chuan he documentary hi upload thar an awm pawha paih nghal zel turin YouTube leh Twitter te chu a hriattir nia sawi a ni bawk a. Opposition party te chuan sorkar chetlak dan chu sawiselin documentary chu Modi ‘lailana’ a awmna an ti thung.
Supreme Court chuan February 2002 khan khatih laia Gujarat riot chhuah laia CM Modi chuan thil tih dik loh a neih finfiahna a awm lo tiin thuremna a lo siam tawh a ni.