Guwahati Masters champion
Ashwini-Tanisha
Pathianni khan Indian women’s doubles pair Tanisha Crasto leh Ashwini Ponnappa tangdun chuan an Super 100 title hlawhchhuah dun pahnihna ni turin Guwahati Masters final-a an khingpui Chinese Taipei pair Sung Shuo Yun leh Yu Chien Hui inkawp chu straight-game hmangin an hneh.
Second-seeded Indian combination hi a hma chawlhkar liamta mai khan Lucknow khuaa Syed Modi International Super 300 tournament final-ah chak zo loin runners-up an ni a, thenawm state khawpuia an rawn insuan chhoh hnuah final lut lehin, minute 40 chhungin an khingpui world no. 81 pair lakah 21-13, 21-19 hnehna an chang.
Tun kha India pair thawkdunin title pathum an lakna ni tawhin, a dang pahnih Abu Dhabi Masters Super 100 leh Nantes International Challenge-te pawh kumin chhunga an sualchhuah a ni.
Kum 34 mi Ashwini kum 20 leka upa Tanisha hi world no. 28 pair niin, kumin January thla atang khan an inkawp tan a; kumin September-October chhunga Hangzhou, China-a India Asian Games squad-ah an tel dun bawk.
India doubles player langsarberte zinga mi Ashwini hi tunhma lamah Jwala Gutta nen hlawhtling taka lo inkawp tawh thinin, 2011 World Championships bronze an lak dun bakah 2010 Commonwealth Games-ah gold medal leh 2014 Commonwealth Games-ah silver medal an lo thawkchhuak dun tawh bawk a ni.
Ashwini leh Jwala inkawp kha 2012 London Olympic Games leh kum 2016 daih tawha Rio de Janeiro khawpuiin Olympic a thlen kum khan ram tan an lo penchhuak tawh a, group stage an pel zo lo ve ve.
2016 Games zawh khan inthenin, Ashwini chu N Sikki Reddy nen an inkawp chho ta a, an pahnih tangdun hian 2018 CWG bronze medal sualchhuakin, Ashwini pawh Gold Coast hmuna Commonwealth Games an nghah tum khan India kuta mixed team gold luh vawikhatna thlentu pawimawh a ni zui ve bawk.
Nikum khan Ashwini leh Sikki pawh chu an inthlah ve leh ta a; Ashwini hian Dubai lama piang Tanisha a kawp zui leh ta a; Tanisha hi Bahrain tan inlan thinin, a major BWF title hmasabere pawh 2016 Bahrain International Challenge kha a ni a; kum 2018-ah India-ah a insuanlut a, domestic tennis huangah khelin, state inelna lamah chuan Goa ai a awh thin.
Kum thum hnuah Tanisha chu Indian team-a sengluh niin, Uber Cup leh Sudirman Cup a khel.
Mixed doubles lamah Ishaan Bhatnagar nen inkawpin an hlawhtling chho viau a, a career-a a tawnsan ber hun tawngbuain world number 18 hial a han hawlh pha a, mahse, a kawppui ber a inhliam zui tak tlat avangin women’s doubles lam a hawi zui leh ta a.
Hun engngemawchen kawppui nghet a hmuh mai theih loh hnuah Tanisha chuan Ashwini a zawng hmu ta a, an hlawhtlinna rah chu a chung lama kan tarlan takte hi a ni.
BWF (Badminton World Federation) World Tour hi level paruka then niin, chu’ngte chu – World Tour Finals, Super 1000 pali, Super 750 paruk, Super 500 pasarih leh Super 300 sawmpakhatte bakah BWF Tour Super 100 level-te niin, a hniamber pawh hian ranking points a keng tel tho a ni.
He’ng tournament tinte hian ranking point leh prize money hrang theuh a keng tel a; Super 1000 level hi point leh prize keng hnem ber a ni.
Guwahati Masters champion Ashwini-Tanisha
