Supreme Court chuan Varanasi khawpui-a Muslim te Biak in Gyanvapi Mosque zir chiang tura Archeological Survey of India (ASI) ten hma an lak mekna chu ni hnih chhung atan titawp rih turin thupek a chhuah. Mosque enkawltu pawl te chuan Supreme Court-ah thu thlen in, he ASI zir chianna hian Varanasi hmuna ram rohlu Kashi Vishwanath Temple dinglama mosque biakin leh a chhehvel laih chhiat a ngaih tur thu leh an ui thu an thlen a ni.
Central sorkar erawh chuan, he zir chianna hian Mosque pian hmang leh lan dan te a tihdanglam loh tur thu te Court hnenah thlenin “brick pakhat pawh lak sawn leh dah belh a ni lovang” tiin a sawi ve thung a ni. Solicitor General of India, Tushar Mehta chuan, zir chianna chuan a hmunhma teh te, thlalak te leh radar hmanga zir a nih choh tur thu Court hnen ah a hriattir a ni. Chief Justice of India, DY Chandrachud chuan central sorkar te thu tanchhan chungchang sawiin, “ASI te hian thupek an hmuh angin Mosque hmunhma hi an laih chhiat a rinawm lo a. Tun atanga kar khat chhung, thawhtanni lo awm leh tur thlengin biakin hmunhma laih loh a nih tur thu hi kan kawl vek a ni” tiin a sawi.
Kumin kum tir lamah pawh khan Mosque thuneitu committee te chuan Allahabad High Court ah an lo zualko tawh a, Hindu pathian te chu he biakin compound velah hian hmuh niin Hindu sakhua zuitu thenkhat ten biak an duh avanga mosque biakin tual vela an lo kal thu te thlenin mahse he an thu thlen hi Court chuan a lo hnawl sak tawh a ni. Mosque committee te chuan he zirchianna avanga an biakin leh a chhehvel laih chhiat a nih hlau in Supreme Court hnen ah an zualko ta a ni.
Gyanvapi Mosque Survey tih tawp rih a ni
