Daily Newspaper

Haaland tel lo Dortmund chak zo lo mah se tlang tho

10

Nilaini zan Champions League Group F inkhel pakhat zawkah Borussia Dortmund chuan an top scorer Erling Braut Haaland tel loin Italian mikhual Lazio lakah point thum an thawkchhuak zo lo a, mahse, 1-1 draw hmangin last 16 lut tura an mamawh erawh an hlawhchhuak zui ta tho a ni.

He inkhelah hian Raphael Guerreiro chuan chawlhlawk dawnah Dortmund hmahruaina goal thunin, half time-ah mualneitu team-in sikhat faiin hma an hruai zet a, second half tir lamah Ciro Immobile chuan penalty atangin Lazio siphurh a sut a, goal dang luhbelh loin team pahnihin point khat ve ve an lungawipui a ngai.

Khelh khat la nei chungin Dortmund chuan he result avang hian Group F atangin knock out round an lut a, Lazio erawh last 16-a inhlangkai turin a lo berah pawh an khelh leh tur Club Bruges an draw a ngai dawn a; Nilaini inkhel dangah Bruges hian sithum faiin Zenit St Petersburg an hneh a, Italian team an la tlang zo mai bik lo.

Borussia Dortmund chhuanvawr Haaland khan a chawn tha a tihnat avangin mikhual a hmachhawn ve thei ta lo a, goal ruk thuna Champions League kal laia goal khung hnember pakhat (joint top scorer) a nihna atangin hma a sawn thei ta rih lo.

A awm lo hi tlarhma lamah Dortmund chuan an tuar tih a hriat a, Guerreiro goal hmangin hma han hruai mai bawk mah se a chhunzawmna lamah an pachhe zui ta tlat a ni.

Kum 20 mi Haaland hian Uefa Champions League game 12 a khelh tawh atangin goal 16 a tilut tling tawh a, Nilaini Dortmund starting lineup-a a hmel hmuh tur awm lo khan fans a tihrilhhai hle a, a coach Lucien Favre chuan kumthar January thla thleng Norwegian hi a chawlh a ngai mai thei niin a sawi.

Lazio captain Ciro Immobile kha Dortmund tana lo khel tawh thin niin, second half tir lam minute 66-ah a club hlui chak tur dalna goal penalty atangin a chhuihlut a; Italian-ho khan Dortmund keeper Roman Buerki an chhaihbuai fo a, Buerki hian hun tawp dawnah tha zet zetin Immobile leh Andreas Pereira-te goal tur a dansak nghe nghe.

Haaland baka player dang inhliam pahnih Emre Can leh Thomas Meunier kawl mektu Dortmund hian Nilaini zan khan chanchin chhe dang neihbelhin, centre back Mats Hummels chu kheimit hliam avangin hun tawp dawnah a baichhuak a, engtia rei nge a chawlh dawn hriat a ni rih lo.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy