Hachheka hmalakna tlawh

Hachhek bialtu MLA Robert Romawia Royte chuan a biala hmalakna thawh zawh tawh leh thawh mek a tlawh kual.
Darlak field, fur tuilianin a chim thin avanga kum 10 chuang hman theih tawhloha ‘tuilian danna’ siam thar chu tlawhin, tuilianin a chim thei tawh loa, kum 10 hnuah field an hmang leh thei a ni. Hachhek bialtu MLA hian Darlak Volleyball Court siam zawh hlim leh Basketball Court siam mek chu khawtlang hruaitute nen an tlawh a ni.
Kawrtethawvenga Basketball court siam zawh thar leh Govt Kawrtethawveng HSS building luah thar pawh tlawhin zirtirtute nen an inkawm a, zirtirtute dil angin photo copy khawl cum printer a pek tur thu a sawi.
Hachhek biala lirtheiin a la tlawh loh khua – Sotapa panna kawng laih mek, cheng nuai 200 senna tur leh Belkhai khuaa lirthei a luh theihna atan kawngpui cheng nuai 375 senga laih mek pawh a tlawh a. Hachhek bialtu MLA hian a lo tiam tawh anga kawngpui thar pahnih laih a ni ta chu lawmawm a tih thu sawiin, PWD leh contractor ten tha taka a hun taka an zawh a beisei tih a sawi a ni.
MLA Robert Romawia Royte hian Tuidama PWD IB cheithat dan tur pawh PWD officer-te nen an enho a. Zamuang to Hriphaw kawng cheng nuai 500 senga PWD-in a siam mek a tlawh bawk.