Sawrkar term hmasaah Hachhek bial chu opposition bial ni mah se, nasa taka MNF sawrkarin hmasawnna hna a thawh chu a langchhuak mek zel tih he bialtu MLA ni ta, minister hlui Robert Romawia Royte chuan a sawi.
Hachhek bialtu MLA hian January 4-11 chhung khan bial chhung khua a tlawh kual a. Sawrkar kalta hunlai khan Hachhek bial chu opposition bial ni mah se, nasa taka hma an lakna a ni tih sawiin, “He bial tan hian sawrkar hmasa in ruahmanna kan siam angin hna kalmek bakah hna thar tam tak thawh a ni,” a ti.
Delhi thleng thlenga a lo umzui ve Sotapa khua leh Belkhai khuaa lirthei luhna tur project – cheng nuai 200 ruahmanna Sotapa Road, nuai 375 ruahmanna project Belkhai Road, metal road khawk chhe tawh siamthatna Zamuang to Hriphaw road project cheng nuai 500 mante thawh tan a ni chu lawmawm a tih thu a sawi.
Kawngpui tha chu hmasawnna atan a pawimawh avangin Bairabi to Zamuang Road cheng nuai 3000 senna tur leh Luimawi to Thinghlun cheng nuai 910 project pawh sanction hmuh tawh a ni, tiin, sports leh education sector-ah hmalak mekna tam tak Hachhek bialah chhunzawm zel a ni dawn tih a sawi bawk.
Assam ramri Mitdel lui leh Kolaliana police duty-te tlawhin he bial mipuiin an thlawp zel tur thu a sawi a ni.
MLA Robert Romawia Royte hi khaw hrang hranga khawtlang hruaituten an lo kawm a, amah thlangtlingtu an nih avanga lawmthu hrilhin bial hmasawnnan theihtawp chhuah a tum thu a sawi ni.
Hachhekah sawrkar hmasa hnathawh a lang chhuak zel – Robert Romawia
