Daily Newspaper

Hailakandi-ah ‘economic blockade’ kalpui nghal

38

Hailakandi-a pawl hrang hrangte chuan Mizoram kalpawhna kawng danchahna neiin bungrua mamawh phur tena Mizoram an luh loh nan tiamchin awm lovin ‘economic blockade’ an kalpui.

Assam-a Barak Valley-a district pathumah nunphung pangngai a khaih lak vek a, Assam police panga nunna chan avanga darkar 12 chhung bandh huaihawt vang a ni.

Sumdawnna hmun leh dawr tinte khar niin Mizoram ramri hnaih Cachar, Hailakandi leh Karimganj district-ahte chuan vehicle tlan tlem te chauh a awm.

Rel erawh dan pangngaiin a tlan niin Northeast Frontier (NF) Railway thupuangtu chuan a sawi.

He bandh hi Barak Democratic Front (BDF) te huaihawta neih niin political party leh opposition AIUF te bakah social organisation hrang hrangte chuan an thlawp bawk a ni.

BDF Chief Convenor Pratip Dutta Ray chuan mipuite chuan bandh an thlawp hle tiin a sawi a. “He bandh hi huaihawt lo thei lova siamin kan awm a, kan police ten nunna an chan a, he buaina hi chinfel a nih ngei kan phut a, thisen chhuak kan duh tawh lo” tiin a sawi.

Hailakandi district-a pawl hrang hrangte chuan Mizoram panna kawngpuite dangchatin Mizorama bungraw phur vehicle a luh hrim hrim tiamchin awm lova dan an tum bawk.

Valley hmun hrang hrangah pawl hrang hrang ten nunna chan awm avanga lungawi lohna lantirin ramri buai chinfel ngei an phut thu an sawi bawk.

Assam Congress party chuan member pasarih awmna committee dinin state unit chief Bhupen Bora hovin ramri buaina hmun tlawhin an kal nghal bawk a ni.

Hetihlai hian Hailakandi Superintendent of Police Ramandeep Kaur chu Cachar police chief-ah dah niin hei hi he hna chelh lai mek Vaibhav Chandrakant Nimbalkar-an hliam a tawrh vang a ni.

Kaur hi Chirang police chief Gaurav Upadhyay-an a thlak thung dawn niin Home and Political Department thuchhuah chuan a tarlang a. Upadhyay hi Pranjit Bora, Guwahati Deputy Commissioner of Police (Traffic) chuan a thlak thung ang.

Nimbalkar chu Mumbai-ah enkawlna tha zawk dawng turin phurh a ni a, hliam tuar na zual deuh pathum dangte chu Gauhati Medical College and Hospital-ah dah an ni thung.

Ramria buaina avanga nunna chan hi pasarih an ni ta a, thawhlehni khan Silchar Medical College and Hospital-ah 6th Assam Police Battllion tanglai Shyamprasad Dusat chu a thih ve leh vang a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy