Daily Newspaper

Hailakandi lamah Assam Police te’n kawng dan bei ngawrh zual

POST NEWS SERVICE

11

Tun hnaiah Mizoram leh Assam te an tualthu a chhia a, Assam lam hian Mizoram pawhtu kawngpui an dang mek. Kawng an dang han tih hian rilru-ah Vairengte pawhtu kawngpui a lang nghal mai thei a, mahse Kanhmun pawhtu kawngpui hi an dang ngawrh zawk niin a lang.

Hailakandi District atanga Kanhmun pawhtu kawngpui hi Mizoram tan kawngpui pawimawh a ni a, Hailankandi District tan pawh a pawimawh. He kawng hi Assam Police te’n an dang mek a, mipui ni lovin police-in an dang tih hi Kanhmun ram atangin a hmuh theih vek.

July ni 26-ah silai a puak a, ni 27 tukah Assam Police te’n Kanhmun pawhtu kawngpui hi an dang nghal tih thu dawn a ni.

Medili lui chu state pahnih inrina anga ngaih a ni a, a kam lehlam lehlamah hian police an awm mek. Assam Police hian ni 27 atangin Medili lui kamah hian kawng hi an dang a, Mizorama lut tur lirthei an lo lettir thin.

Chawlhkar liam ta Inrinni, July ni 31 khan Assam Police hi nasa lehzualin an che a, lui kam, lei thlen dawnah bunker angin leivung ip an tiang tih thu dawn a ni.

Vairengte pawhtu kawngpui pawh an la dang a, silai puah hnu-ah he kawngpui National Highway 302 kaltlanga Mizorama lirthei lut a la awm lo tih police te chuan an sawi.

Thu dawn danin, Mizoram atanga chhuak chu a awm zeuh zeuh a, hnam dang lirthei, truck tlan a awm zeuh zeuh. Hrileng dova inkharkhip a nih hnuah he kawngpui kaltlanga khualzin phur lirthei chhuak hi a awm vak tawh lo hrim hrim.

Tripura atangin Mizoramin ni tin mamawh thil hrang hrang a chawlut mek a, sorkarin tuialhthei leh buhfai a thiarluh bakah mimal lirtheite’n ni tin mamawh thil an thiar mek. Lirthei chhuak lam hi Kanhmun VLTF te’n chaw an lo pe thin a, a rawn let lamte thingpui an lo pe thin bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy