Haiti Prime Minister Ariel Henry chuan an ram a luh theihloh hnuah Puerto Rico a pan a. US State New Jersey atangin capital San Juan ah thawhleh khan a tum tia sawi a ni.
Tun hnaiah Kenya a tlawh hnuah Henry awmna chin hriat mailohin a awm a, chutihlaiin Haiti chu tharumthawhna khatin Gang te chuan Henry an an ram a luh loh nan international airport chu lak ngei tumin an bei thung.
Gang leader Jimmy “Barbecue” Cherizier chuan prime minister chu a bang tur a ni tia sawiin a bang lo a nih chuan Haiti ah civil war chhuakin nunna chan tam tak an awm dawn a ti bawk.
Prime Minister meuh an rama haw thei lova siam chuan Haiti dinhmun derthawng lutuk a philang chiang hle a ngaih a ni a, a chuanna thlawhna chu Haiti leh a thenawm Dominican Republic a tum tir phalloh a nih hnuah Puerto Rico ah a tum ta ringawt mai niin local news sites te chuan an tarlang.
Dominican Republican chuan Hati nena an airspace te chu an khar nghal vek thu a sawi a. Pathianni kaltaa Haiti a emergency puan a nih hnuah thlawhna lut leh chhuak tin te khap nghal vek a ni a.
Haiti a prime minister luh remtihlohna chhan hi a himna duhna vang nia ngaih niin gang leader ten bang tura an nawr karah a thlawhna a tum lui a nih chuan buaina nasa zawk a chhuah hlauhna vang tia sawi a ni.
Chutihrual chuan prime minister ber an rama a let remtihloh chuan a hnuaia awm ten an lawm lem lo tihna nia ngaihna a awm bawk a. Henry thlawp tute chuan Haiti a let leh lo ringawt chu a dinhmun tichhe zawk tu an ti bawk.
Ariel henry hian karkalta khan Guyana a regional submit neihnaa tel turin Haiti a chhuahsan a, chumi hnuah an rama sipai tam zawk dah a nih theih nan Kenya panin inbiakna an nei a, chutihlai chuan gang rual police officer hlui Cherizier kaihhruai te chuan police station leh lung in beiin lung in tang 4,000 chuang an lo chhuah zalen a ni.
Sipai te an ram airport venga dah te leh police academy te pawh armed gang member te hian an bei bawk a. UN chuan tuna Haiti buaina avanga in leh lo awmna tur nei lo 15,000 an tling nghal der tiin a sawi.
Ariel Henry hi kum 2021 a Colombian mercenaries tena President Jovenel Moise an kahhlum hnuah inthlang lovin prime minister atana ruat a ni a. 7 February kha inthlan hun tura tih a ni a, mahse, inthlan a nih loh hnuah lungawilohna nasa taka lantira awm zuiin Haiti chuan buaina nasa zawk a hmachhawn zui ta zel a ni.
Armed-gang te hian khawpui ber Port-au-Prince 80% vel an thunun tawh nia sawi a ni a, Henry chuan khawvel ram dang te chu an sipai te tirluh tura a ngenna chu eng ram mahin an chhang lo.
Haiti prime minister an ram luh phal lo
