Mahmuaka Chhakchhuak
Kum 2023 thlah liam zan leh Kum thar 2024 lo thleng tur kan hmuah zanah khan mi tam takte chu hlima an au dur dur laiin keini chu mangang leh thlaphang reng rengin hun kan lo hmang thung a, kan thlaphanna pawh hmun tin atanga puak thei thil chi hrang hrang puak nasa lutuk avangin kan naute, kum khat leh thla hnih mi lek chuan a hlauh lutuk avangin awm ngaihna a hre lo a, a hlau thlabar lutuk chuan midang pawh min awm hle hle tir thei loin ina awm zawng zawng kan zavaiin kan buai phah a nih kha.
Naupang thlabar mangang hmel hmuh chu hrehawm tak a ni a, khumah kan mutpuiin a lu chu blanket-in kan tuam tlat bawk a, kan thiam tawk leh theih ang tawkin han thlamuan tum ngial mah ila pawn lama halpuah puak thawm a lo rik leh chuan khuma awmpui pawh chuan awmzia a awm lo a, a kil thei ang ber, thawm ri hriat theih lohna ber tura ngaih bualin thleng thlengin bihrukna atan kan hmang a, kan buai takzet! Halpuah pangngai puak chu a nep deuh a, Jeletine nge puak dum dum rite phei kha chu keini tan chuan thinrimthlak tak a ni.
Hlima lawmte chu demna tur erawh a awm hauh lo a, tu tan pawh kum thar dam taka thlen chu lawmna tur hliah hliah a ni. Chutianga hlima kan lawm rual chuan midang tan hnawksak leh bengchheng kan ni thei tih erawh ngaihtuahna nei tel hram ila. Chu chauh pawh ni loin khatiang huna boruak kan tihbawlhhlawh dante erawh chhut phak rual a ni kher lo ang a, chu boruak chhia chu midangin an tuar dawn lo a, keimahni bawkin kan tawrh leh dawn avangin a nghawng tur ngaihtuahna nei chunga thiltih thin hi a tha viau.
Tehna hmanrua awm sela, pawn lama puak thei thil chi hrang hrang haltute hlimna leh lawmna aiin anmahni thil hal avanga chhungkuaa kan lo thlaphanna leh manganna kha a hniam bik hauhin a rinawm lo. Kan dinhmun kha inthleng theih ni sela eng nen pawh kan thleng huam ang tih tur a ni a, a hun chhung chu rei loin darkar hnih emaw vel lek pawh ni sela kan tan chuan hriatreng tlak loh leh theihnghilh theih bawk si loh thil min hnutchhiah reng tawh dawn a ni.
Pathian zarah kan dam ang a, kumtawp kan thlengin kumthar pawh tluang takin kan thleng leh turah ngai ila, chu hunah chuan midang ngaihsakna nei hauh loin bengchheng kan siamin puak thei thil hal an awm leh ang em, sorkar lamin an khap chung chung pawha hal lui an la awm leh ang em? Keini chuan thlaphang leh mangangin kan awm leh dawn em tih chu kan ngaihtuah lo thei lo a, kan huphurh lawk hle mai. Khapna pawisa loa ti lui tawk hi kan lo awm zel bawk si avangin huphurh tak chungin he hun lo thleng tur hi kan thlir a, khatiang taka naupang thlaphang hmel kha hmuh nawn leh kan duh tawh ngai loh avangin ‘Hal tawh lul su aw…..’ tih baka ngenna siam kan thiam bawk si lo a. Kan ngenna hi (Sorkar khapna a ni ber zawk nain) hi zawm a, kumhlui thlah zana halpuah hal thawm a awm miah loh chuan hlim takin kan awm ve thei dawn si a.