Daily Newspaper

Hamilton duhsaktu Serena

9

Pathianni Russian Grand Prix an tlan hma lawk khan American tennis star Serena Williams chuan a mihanpui leh amah ang bawka chak tam record beisei ve mek Lewis Hamilton chu Formula One race hnehna chang hnem ber Michael Schumacher-a record (91) tluk ngei tura a duhsak thu a sawi-chhuak a, Sochi tlankawngah Briton driver-in a tum a hlen zo ta rih lo.

Mercedes driver Hamilton tan vawikhat chakleha Schumi record ropui tluk mai tawh tur a nih laiin Russia ramah podium hniam ber a luah pha ta awrh chauh a, a team-mate Valtteri Bottas chu pakhatna niin, Red Bulla khalhtu Dutch driver Max Verstappen pathumna a ni a, world champion Hamilton hian record dinglai tluk turin October ni 11 Eifel Grand Prix a nghah leh phawt a ngai dawn.

Hmeichhe tennis lamah Serena William pawhin grand slam ladies singles title la hnem ber Margaret Court-i record ding lai (24) tluk turin vawikhat chiah major title lak ngai tawh mah se grand slam final a khelh hnuhnung hoah a chak thei ta reng reng rih lo a, French Open lama bul a tan leh dawna media a hmachhawn tumin amah ang bawka infiamna danga record um ve mek a thian tha Hamilton tan duhsakna a hlan.

Williams chuan a thianpa Briton chungchang sawiin, “He pa hi champion thinlung pu tlat mi a ni a, a training lai pawh ka thlir tawh a, taksa lamah pawh a hnaah a chiang a, sawiin a siak lo. Kan chhuan kal mekah hian ka ngaiha driver ropuiber a ni.

“Driver bawn ve bawk Schumacher-a record hi a kh<m dawn tih ka chiang a ni,” a ti.

Mercedes driver nena an inkungkaihna tarlang telin, “Kei leh Lewis hi kan in close tawp a, kum tamtak ka lo hriat tawh niin, he pa hi ka hmangaih a, ka thian tha lutuk a ni.

“A emotional ve a, a sawi anga ti mai chi niin, chu chu a nihna a ni. Tunge i nih tihah a buai lo a, chu chu amah ka lawm em em chhan pakhat a ni,” tiin car intlansiak level sangber kaltlanga chi inthliarna do tlat mi Hamilton a fak bawrh bawrh.

Record dinglai nihrualpui tuma Grand Slam singles title 24 lak tlin tumin sixth seed Serena hian Thawhtanni khan Paris-ah bul tanin, a chipui Kristie Ahn lakah harsa takin set khatna a la hram a, a hnu lamah erawh nuamsaa set lain, 7-6 (7-3) 6-0 hnehna nen second round a lut a, Bulgaria nula Tsvetana Pironkova a hmachhawn leh ang.

Hetih lai hian mellung thar phun tura a duhsak ngawih ngawih cham-pionship leader Hamilton chu Russian GP-ah a chak zo lo a, Germany rama tlankawng harsa Nurburgring lamah tha tharin record a beisei leh dawn a ni. Nurburgring hi kum 2013 hnu lama a vawikhatna atan F1 calendar-ah kumin hian a kir ve leh chiah a ni.

Pathianni Russian Grand Prix-ah Hamilton hian pole position atangin bul a tan a, Sochi tlankawng hi Formula One race hnehna vawi 91 a chan tlinna ni tura ngaihna a lian a, mahse, Ferrari great Michael Schumacher-a all-time record a tluk zo leh ta rih lo a, ti chung hian driver standing lamah chuan Briton hian a team-mate leh amah hnaihbertu ni bawk Bottas lakah point 44 laiin hma a la hruaif^l a, kumin intlansiak vawi 17 awm tura vawi 10 an tlan tawhah a title humhim turin dinhmun tha tak a la luah zui zel thung.

Finn Bottas khan pakhatnain point a ken tel piah lamah fastest lap a l^k avangin bonus point khat a rut tel a, tun season-a a chak vawihnihna niin, July thla Austrian opener hnu lama a chakleh vawikhatna a ni nghal.

Hamilton hian Sochi tlankawngah hremna (two five-second penalties) a hmuh avangin a mellung phun beiseina a sukuk phah a, intlansiak zawhah a tan ni tha ber a nih loh thu sawi chungin a laka beiseina nghattu a fans chungah lawmthu a sawi a, a tum hlen zo rih lo mah se point a hmuh avanga a lawmthu leh Valtteri a lawmpui thu a sawi.

An driver pahnih one-two zo ta lo mah se Mer-cedes tan lawmlohna tur a awm lo a, 2014 Winter Olympics nghahna hmun Sochi-a Russian Grand Prix an tlan atangin hnehna an la chang chho ta zel a ni.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy