Daily Newspaper

Hamthatnain Chanu bawm

10

A thawhna Minister for Railways chuan To-kyo Olympic Games weightlifting 49kg cate-gory-a silver medal awrh-tu Meitei nula Chanu Saikhom Mirabai hnenah cheng vaibelchhe hnih an pek tur thu leh Northeast Frontier Railway-a an kaisantir tur thu an puang.

He thu hi Railways minister Ashwini Vaish-naw ngeiin puangin, Mirabai Chanu talent, huaisenna leh thawhrimna chuan khawvel puma mi vaibelchhe tel a hneh hle tih a sawilang tel.

Chanu hi kum 2018 April thla khan North-east Frontier Railway-ah Officer on Special Duty (Sports)-ah kaisantir niin, tunah hian a hna chelh lai atangin an kaisantir leh ta a ni.

Weightlifter Mirabai Chanu hian belhkhawma kg 202 (87kg+115kg) chawiin silver medal a awrh a, 2000 Sydney Olympics-a India tana bronze medal awrhtu Karnam Malleswari hmakhalhin Indian weightlifting-ah record tha zawk a hnutchhiah.

Manipur ritchawichak Chanu hian Thawhtanni khan New Delhi a lo thleng a; hamthatnain a bawm kal mek a, a zikchuahna Manipur sawrkar chuan cheng vaibelchhe khat an pek tur thu an puan bakah an state police department-ah hnalian an pe tih an tarlang tel.

Manipur Chief Minister N Biren Singh chuan Thawhtanni vek khan an nula chhuanvawr hnena sumfai an pek tur zat a puan rualin Additional Superintendent of Police (Sports) hna an pe tel tih a sawi a, Chanu chu Railways-a a hna vawnlai bansana Manipur police department zawm turin a ngen zui nghal.

Biren Singh chuan, “Mirabai hi a hna vawnlai bansan turin ka ngen a, kan hna pek hi a pawm a nih chuan rampumin amaha Olympic gold medal kan beisei mek a tihpuitlin theihna’n Olympic lo awm leh tur atana inbuatsaihna kawng kan hawnsak ang,” a ti.

Manipur sawrkar hian an state atanga Olympic gold medal awrhtu hnenah cheng vaibelchhe 1.2 tiamin, silver medal latu tan vaibelchhe khat leh bronze hawntu tan cheng nuai 75 an tiam a, Chanu hnenah hian an tiam zat sumfai an pek tur thu an puan bakah police officer hna an pe tel ta bawk a ni.

Chanu hian Thawh-tannia IGI Airport, New Delhi a thlen hnuah nimin khan Imphal a lut a, state sawrkar chuan Imphal-a city convention centre-ah an fanu rangkachak lawmna hun hi buat-saihin, he hunah hian Chief Minister chuan an state atanga Olympian dang Judoka Likmabam Sushila Devi chu Constable atanga Sub-Inspector hna an chelhtir tur thu a tarlang tel.

Judo inelnaa 2014 commonwealth games silver medalist Sushila Devi hi kumin Tokyo Games elimination round of 32-ah Hungarian Judoka hneh loin a tlawm a, ram tan medal hlawhchhuak zo lo mah se Manipur sawrkar chuan an kaisantir dawn ta tho a; Biren Singh chuan Devi telin an state atanga Olympian pangate hnenah cheng nuai 25 theuh an pe dawn tih a puang bawk.

Manipur sawrkar hi Chanu hlawhtlinnain a tiphur hle niin a lang a, an state chhunga World Class Weightlifting Academy din thuai an tum thu an sawi.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy