Rev Dr Ramengliana
Khawtlang pumpui mai Pathian Thua tui tharna leh thlarau lam thil ngaihsak tharna a hna thleng mup mup mai tluka thil lawmawm hi vang tak a ni. Pathian faka zai kham theih loh te, Pathian Thu sawi leh ngaihthlak nin hleihtheih loh te, chhungkua leh khawtlang nun a tha lama dang ta vuk mai te hi a thlakhlelhawm thlawt a ni. Hetiang thil hi kan khawtlangah rawn thleng leh thin sela, chaute min rawn tiharhin khup zawite rawn tichak leh se tih duh lo an awm lo vang. Mahse chu chu kan duh danin a thleng reng hauh si lo a nih hi.
Hetiang harhna dila tawngtaina pawh hi Mizo Kristianten kan chham tam khawp mai a. A chhanna pawh kan hmu fo thinin a hriat theih a. Harhna hi kan dil avanga lo thleng nge, chung Pathianin tul a tih hunah a rawn thlentir mai thin? tih zawhna chu chhan har ve tak a ni a. Ngaihdan pawh a inang lo nuk a ni awm e. A hun takah Pathianin a rawn thlentir ang tih ring chunga taima taka tawngtai hi kan tih theih awm chhun chu a ni mai awm e. Kohhran chanchinah hian chutiang hun duhawm tak tak, mihringte sawifiah hleihtheih loh chu a rawn thleng thin tih kan hre si a.
Thil mak tak erawh chu Thuthlung Thar han bih chian hian harhna dil tura infuihna leh chutianga tawngtai tura inzirtirna lam hmuh tur a vang pharh mai hi a ni. Han ngaihtuah chian phei chuan kan lo tisual thui tawh viau emaw ni tih theih hial a ni. Thuthlung Thar zirtirna chuan ringtu nun chu harhna thlen lai hun leh harh loh lai hunin a then hrang lem lo va, engtik hun lai pawh hi ringtu tana Pathian hnaihna hun leh Pathian tana nun chhuah hun atan a zirtir mai zawk a ni. Thuthlung Thar chu harh leh harh lovah a buai lo a ni ber awm e. Hetiang kan sawi avang hian harhna hi hnualsuat tur tih kan tumna a ni lo va, a nih dan tur tak nih tir a tulna kan sawina a ni zawk.
Harhna a lo thlen hi Thlarau Thianghlim hnathawh ngei a ni lo thei lo va. Pathianin a mite chu kai harhin amah hriatna thar a pe tlang a, chu Pathian hriatna chuan mahni inhriatfiahna a thlen a, sual inhriatna thuk tak lo thlengin Pathian khawngaihna a lo lang fiah nghal bawk thin. Chutiang thil zawng zawng insuih khawm chuan hlim leh lawmna mak danglam tak a rawn thlen ta thin a ni. Hetiang thil lawmawm tak hi mi hrang hrangah a thleng reng a, harhna hunah hi chuan a thleng rual nasa bik a ni ber awm e. Mi tam tak chunga a thlen hian a thawm a lo lian ta bik thin a, a hnuhma pawh a langsar bik thin bawk a. Nuam pawh kan lo ti tlang zual ta thin a ni.
Kan hriat atana thil tha tak erawh chu Thlarau Thianghlim harhna leh khawvel harhna pangngai hian ze intawm a nei thin hi a ni. Hlimna te, phur tharna te hi harhna dik hriltu an ni kher lo tih hriat a tha a. Thlarau Thianghlim tel lo pawhin miin an chang thei a, an lo chang tawh thin a ni. Thilmak kan tih tam takte pawh hi harhna suakin a keng tel ve thei a, harhna dik leh dik lo hriltu an ni lem lo. Ringtute tana thil harsa tak erawh chu harhna dikah hetiang thil hi a awm ve theih tho avang hi a ni a. Dawnsawn dan leh ngaihven dan tawk kan thiam a tul ta thin a ni.
Hei hi a pawimawh em emna chu Hmelmapa hian remchang lain mi bumna hmanrua atan a lo hmang thei tlat mai a. Mi tam tak chu an tlu sual tawh tih a lang reng bawk a. Han chhui chian chuan Zoram khawvela ‘kal sual’ kan tihte hi hetiang thila fimkhur tawk loh leh tuipui chin tawk neih loh lutuk vang a ni awm e. Hemi kawngah hian Kohhran kaihhruaina leh duh dan ngaih chan thiam hram hram hi a finthlak thin. Kan thlarauna tuma control zawh tawh loh leh mi dang thlirna a ngaih pawimawh zawh tawh loh chuan fimkhur a hun a ni ngei ang.
Harhna duh luata thlentir tuma beih chiam mai hi Hmelmapa min bumna trick pakhata chhiar theih a ni ngei ang. |hahnemngai taka Chanchin |ha hi hril tur a nih lai leh thlarau bote pawh vei tak tak tur a nih lai hian, harhna thlentir ngei ngei tum luatah tui fim tawk lo lo hman zauh zauh te thil theih tak a ni. Kristian rawngbawlnaah hian a ‘result’ a pawimawh viau lai hian ‘dikna leh rinawmna’ te hi a pawimawh zawk fe a ni tih kan intuh ngheh a ngai. Tunlaiah Pathian Thu sawi inti si a tihdamna lem te, thilmak siam chawp te, zawlnei derte pawh an lo awm ta niin thu a thang thin. Hetiang hi a pawi takzet a ni.
Harhna dik tak chuan Pathian hriatna thar min pe ang a, keimahni ngei inhmu fiahin kan sual kan ten ang a, Pathiana lawmna leh hlimna thar min pe turah ngai ila. Engemaw ‘miracle’ rin duap deuh tak avang mai maia han phur thar suah te, nut deuh but hlimna mak danglam angreng tak lo thleng lo ngaihsan viau mai te, Pathian Thu tak a nih leh nih loh pawh ngaichang lem lo va phurpui zel mai te hi Kristian puitling lo zia dik tak a nih hmel a. Mizo Kristiante hian kan thansan a hun ve ta a ni lawm ni? Kan Revival Speaker te pawh boruak nu deuh tak min neihpui ngei turin i beisei tawh kher lo ang u, Pathian thutak min hrilh mai hi a tawk lawm ni?
Revival (Harhna) atangin Revivalism (Harhna ngaihsan uchuakna) a luh a awlsam khawp mai. Harhnaah lo chuan Pathian hi a ngawi vung vung anga ngaih mai a awl. Harhna lovah chuan Thlarau Thianghlim hi a che ta lo emaw tih mai theih a ni thin. Revivalism-a lut laklawh chuan hringnun pangngaia Pathian hnathawh an hmu thiam lo chawk. Chutiang nun erawh chu Pathian Thuin min hruai a tum dan a ni hauh lo tih kan hre dawn nia. Ringtu chuan engtik lai pawhin Pathian nen an lengdun thin a ni zawk.