Pathianni zing lam khan Saudi Arabia khawpui Riyadh in Boxing bout ngaihven hlawh tak a thleng a. Palian inhnek hmuhnawm takah champion lai Tyson Fury chuan UFC palian champion hlui Francis Ngannou chu harsa takin a hneh a, tlawm a nei lo tluang zel. Boxing a hmel thar Ngannou lakah chak bawk mah se Fury chak danin sawisel a hlawh zui hle thung.
Boxing-a palian huanga boxer tha bera ngaih ni mek, tlawm la nei lo a, WBC heavyweight champion ni lai mek Tyson Fury hian UFC palian huanga champion hlui, khawvela kut thlak na ber ang hiala sawi thin Cameroon fighter Francis Ngannou hi awlsam takin a hneh rin thup a ni a. Ngannou hi professional boxing luhchilh hlimhlawl a nih vangin boxing ring chhungah chuan UFC fighter dangte ang thoin a talbuai ve mai rinna lian tak a awm sa bawk. A hmachhawn tur hi palian huanga tha ber a nih miau vangin Ngannou tan chak theihna chance a awm lo hulhual anga ngaitu pawh an awm.
Boulevard Hall-a mipui 26,000 ze hmaah inhnek tan a ni a, rinlawk ang ngeiin Tyson Fury-a’n bul a tan tha a, round khatnaah chungnung zawk a ni nghal. An inhnek reia mak tak maiin Ngannou a khel tha tulh tulh, Cameroon boxer hian round thumnaah a khingpui a hnek tlu ta hial. Hnek na zet Ngannou hnek dawl zo lovin tlu mah se boxer tuarchhel Fury a tho thuai a, a buai zui lo. Round thumna hnu lam round dangah an inhnehtawk chho viau a, round riatnaah Fury a talbuai nawn leh. Round riatnaah hian Ngannou hian chiang zetin a hnek fuh zawn a, a hnek tlu leh teuh hle a, tawnhriat ngah Fury hi tlu em lovin a dingtluan thei hram. Round riatna hnu lamah pawh an inhnehtawk zui leh ta viau bawk.
Inhnek hmuhnawm tak a tawp a, mi tam takin boxing-a mi thar lakah boxer ropui Tyson Fury a tlawm turah an ngai hman. Result puan chhunzawm a ni a, endiktu pakhat chuan point 95-94 in Ngannou chak tir phawt a, Fury lungphu a rang hman hle. Endiktu pakhatin point 96-93 laiin Fury a chaktir ve leh a, result hnuhnung berah point 95-94 in a chak nawn leh a. Tlawm tura ngaih ni mah se split decision in Tyson Fury a chak leh ta nge nge. Francis Ngannou lakah Tyson Fury chak dan hian sawisel a hlawh zui hle thung.
Sawisel hlawh tak chunga hnehna chang Tyson Fury chuan a khingpui Francis Ngannou chu kum 10 chhunga khingpui hautak ber a nih thu a sawi a, a fak zui hle. Professional boxing a khelh hmasak berah chak zo lo mah se Ngannou hian fak a hlawh hle. Palian huanga boxer ropui Tyson Fury hmaah kha ti khawpa thaa a inlan thei a nih chuan World Champion nih theihna chance tha tak a nei tih rinhlelh rual a ni lo. UFC-a hriat lar hmasak ni mah se Ngannou hi boxing tuipui hmasa a ni a, tualchhungah inhnek a lo hmachhawn ve tawh thin. Boxing a bul tan a nih miau vangin Fury hmaah pawh a khawr lo hle a nih kha.
Inhnek vawi 35 hmachhawn tawha tlawm la nei lo Tyson Fury hian WBA, WBO leh IBF champion Oleksandr Usyk a hmachhawn zui dawn em tih a la chiang thei lo va, palian huanga tha ber fiah tura an inhmachhawn a nih chuan inhnek ngaihven hlawh tak niin, palian huanga kawnghren ngaihhlut hlawh pali kawl khawm thei hmasa ber an awm theih phah ang.
Harsa takin Fury a
