Daily Newspaper

Harsat laiin Pathianin Congress party min thukru – Lal Thanhawla

9

Mizoramah hmasawnna hna thawk turin Pathian-in Congress party a ruahman lawk thin a, harsatna a thlen tak takah erawh chuan a thukru leh thin niin Congress president Lal Thanhawla chuan a sawi.

Zirtawpnia MPCC-in mithar lawmluhna inkhawm an hmanah Lal Thanhawla hian thu a sawi a. Pathian thuin min zirtir chu mirethei zawkte ngaihsaka tanpui a ni, tiin, khawvelah kuthnathawkte tel loin eng sawrkar mah an kal thei lo tih a sawi bawk. Hei vang hian mirethei zawkte khaihchhuahna atan Congress party chuan NLUP a ruahman a, chhungkaw tam takin an dinchhuah phah nia sawiin, hun lo awm leh zel turah pawh Isua Krista duhdanin an party chu a kal zel dawn tih a sawi a ni.

Medical college tha leh changtlung tak din turin an sawrkar laiin hma an lak thu leh a hmingah pawh Mizoram Institute of Medical Education & Research an tih thu a sawi a. MNF sawrkarin a hming thlakin college satliahah a chhuah ta tih a sawi. Bairabi rel station tih len te, Lengpui Airport siamte pawh a hunlai chuan dodal leh nuihzat hlawh mah se, tun hrileng dona kawnga hmanraw pawimawh leh tangkai ber ber an ni ta, tiin MPCC president chuan, “Heng hun harsa kan hmachhawn tur atan hian Pathianin Congress party hi min lo buatsaih lawk a, hmanruaah min hmang a, harsatna alo thlen tak takah erawh chuan min thukru leh si a, Pathian thil rel dan hi a ropui takzet a ni,” a ti.

Thenawm ramte nen inkalpawhna tha kan neih a ngaih avangin Congress sawrkar laiin ruahmanna thui tak siamin hma an la tih a sawi a. Tuna kan chhehvel ramte nena insumdawn tawnna tur kawng laih mekte, ruahmanna awm mekte chu Congress sawrkar laia bul tan vek a nih thu te; Burma leh Bangladesh nena insumdawnna tur kawngpuite, lawng hmanga awlsam zawka bungrua lakluh leh thawnchhuah theihna tur thlenga hma la in, sawrkar laipui pawhin a phurpui em em zel thu te a sawi a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy