Harsatna ata mipui khaichhuak turin
Congress-in thapui thawh leh dawn
– Dr Lalmalsawma
MNF sawrkara mipui beidawnna chu ZPM sawrkarin beidawnna a thlen belh leh mek a, Congress party chuan ram mipui harsatna ata khaichhuak turin thapui an rawn thawh leh dawn tih Dr Lalmalsawma Nghaka chuan a sawi.
Mamit district khaw hrang hrang a tlawhnaah MPCC treasurer Dr Lalmalsawma chuan MNF sawrkarah khan mipui an beidawng hle a, a bikin kuthnathawktute leh thalai rual an beidawng hle a. Vawiina kan sawrkar hrawn pawh hian mipui nawlpui tan beidawnna an thlen mek tih a sawi. Congress party chuan miharsa rethei leh mi nawlpuiin dinhmun tha leh ngelnghet zawka an inhlankai theihnan policy tha leh beiseina thar nen nasa takin hma a la tih a sawi bawk.
“Congress party chu mipui nawlpui, miretheite tan a din ngaiin ala ding reng a, mi harsa zawkte tan NLUP aia changtlung zawk leh tha zawk scheme kan rawn chhawp chhuak leh dawn. Congress party hruaitute chuan nuam tawl ve loin, kan ram mipui harsatna hrethiam a, khaichhuak leh turin thapui kan rawn thawh dawn a ni,” a ti.
Kan sawrkar hrawn mekah mipui an rum nasa-in thil man a sang a, chhiah an tihpun avang leh buhfai man a tih san vak avangin mirethei tan khawsak a harsa tih MPCC hruaitu hian a sawi a. Hetih lai hian an party hotu rual, MLA leh minister-ten nuam an tawl mek nia a lan thu sawiin, “Mizorama la thleng ngai lo pawh a thleng chho a, minister-ten sawrkar sum hmangin anmahni in cheinan cheng vaibelchhe tel an hmang a, sofa set nuai 5 chuang man an lei tih thawmte kan hre ve leh zel a ni,” a ti.
Ruling MLA leh party hotu rualte chu lirthei tha leh changkang hmangin an intlansiak emaw tih tur khawpin lirthei manto an lei zung zung a. Ram mipui an retheih sawt sawt laia hetia nuam an tawl chu pawi a ni thu a sawi bawk.
Harsatna ata mipui khaichhuak turin Congress-in thapui thawh leh dawn – Dr Lalmalsawma
