Daily Newspaper

Harsatna liantham awm loin kumthar hmuak thleng

21

Aizawl, January 4: Kum 2021 thlah ni leh kum 2022 chuankai ni ah Mizoramah harsatna liantham thleng a awm lo a, sawrkarin halpuah leh halmawi a khap erawh Aizawl khawpui bakah khawpui dang thenkhatah zawm a hlawh lo.

Covid-19 len avanga sawrkarin inkaihhruaina a siam zulzui leh ngenna a siam angin, 2021 Krismas vuakvetah leh kumthar ni thlengin tualchhung kohhran, a bikin Aizawl khawpuiah leh Lunglei khawpuiah chuan kohhran te biak ina a huhoa zai an tam loh bakah ruai theh an awm meuh lo. Ruai theh ai, a sa hring leh sa siamsa sem kohhran engemawzat an awm. Hetihlai hian thingtlang hmun tam zawk leh district headquarters thenkhatah chuan biak ina an zai tawh bakah Krismas ruai an theh a, kumthar ruai theh engemawzat an awm bawk.

Hriat theih chinah hunpui lai hian Mizoramah harsatna liantham tak, state chhung nghawng khawp thil thleng a awm lo a, zan lam curfew bawhchhia erawh an awm nual a. Zu leh ruihtheih thil dang avanga man leh sum chawitir an awm reng bawk tih police leh Traffic Police lam chuan an sawi.

Hetihlai hian sawrkarin hunpui laia halpuah, halmawi, sky lantern leh silai lem a mu kapchhuak thei chi te khapin khauh taka kalpui tura mipui hriatah pawh an puang chamchi chungin, kumhlui thlah dawn hnaih atangin halpuah leh halmawi ri hriat tur a awm tan a, Aizawl khawpui leh district khawpui dang thenkhatah chuan an hal nasa hle tih thu dawn a ni. A bikin, halmawi hal a nasa a, police lam chuan sawrkar khapna zawm loa hal luite hi an umzui zel tur thu leh video hmangin finfiahna an nei tha tawka an ngaih thu an sawi a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy