Mizoram mipui harsatna sukiang turin Pathianin Congress party a hmang thin tih an party thupuangtu Dr Lallianchhunga chuan a sawi.
MPCC Campaign Committee ruahman anga Mamit district khaw thenkhat a tlawhnaah MPCC thupuangtu chuan Mizoram mipuiin harsatna kan tawh apiangin a sukiangtu atan Congress party hi Pathianin a hmang tawh thin tih a sawi a. Kum 1984-ah Zoram mipui mamawh ber remna leh muanna thlen tir turin sawrkarna an chelh a. Kum 1989 leh 1993-ah rambuai avanga khawsak harsa, dinhmun tleu tawhten lei rem an rah theihna’n Congress party bawk mipui rawngbawl turin a chawisang leh tih a sawi.
MNF sawrkar hmasaah Mizoram sum dinhmun chhia siamtha turin Congress party a sawrkar a, Mizoram leiba tam tak rulh nghal a ni, tiin, “Tunah pawh MNF-in kum 4 chauh sawrkarna an chelh chungin kan leiba chu vaibelchhe 6000 chuangin a pung a, Mizoram sum dinhmunin a sen a kawk a, he harsatna sukiang turin finance enkawl thiam, enchhin chawp ngai lo hruaitu, Pu Lalsawta hi Mizoram hruaichhuak tura Pathianin min pek a ni,” Dr Lallianchhunga hian a ti.
Congress hruaitu Pu Lalsawta chu party dangte pawhin an awh thu leh amah beih tumten beih ngaihna an hriat loh thu sawiin, “Tunah hian Mizoram leiba chu India ram state-ah GSDP atanga teha leiba nei tam ber pawl kan nih avangin mithiamte lu a hai a, MNF sawrkarin kan ram sum an enkawl danah an mangang takzet a ni. Chu sum leh pai tam tak leibatna sal atanga Mizoram chhanchhuak leh tur chuan Mizoramin Pu Lalsawta hi a mamawh a ni,” a ti.
Tang puihna hmanga kuthnathawktute kut an tih chak tur thu Congress thupuangtu hian a sawi a. An party chu miretheite tana ding thin a nih thu leh mipui hnena an intiamna tihlawhtling thintu an nih thu a sawi bawk.
Harsatna sukiangtu ah Pathian-in Congress a hmang – Dr Lallianchhunga
