Hmasawnna thlentu tur ber transportation network hi Mizoramah chuan ‘harsatna thlentu’ ber la ni zawk tlatin a lang. Tuna Lunglei leh Tlabung inkar two lane kawngpui NH 302, kum li zet buaipui tawh chu mipui awlsamna aiin harsatna lian tak thlentu a la ni tluang zel tih a lo lang leh ta.
Lunglei |halai Pawl chuan helai kawngpui siam hnathawh a muan lutuk avangin lungawilohna lantir an tum tih kar kalta Inrinni khan press conference kaltlangin an puang a. A tul a nih chuan hnathawktute office kharsak thlenga hmalak an tum tih an sawi bawk.
Lunglei-Tlabung NH 302 hian chanchinthar lamah leh social media lamah hmun a luah ngun malh malh ta hle a. Kumin July thlaa Tlabung thalaite mangangin social media lama thlalak an thehdarhah chuan ‘distance between Lunglei to Tlabung (NH 302) – 75 km (approx); Travel Time – 9 hours’ tih a ni. Chumi awmzia chu, darkar 9 chhungin lirtheiin km 75 (75km/9hrs) a tlan hman tawk tihna a ni a, chu chu darkar khatah km 8.3 tihna a ni. Kawngpui tha pangngaiah hian lirthei speed hi alo berah 50km/hr (darkar khatah km 50) tal a ni tlangpui thin.
He kawng siam hna enkawltu NHIDCL leh a siamtu contractor BRN company te hian ruahtuiin hna a tih khailhlak thin thu chhuanlamah an hmang thin a, mahse hei hi chhuanlam tling niin a lang lo. He project an lak dawn hian thawh zawh hun tur bituk chhunga thawk zo hman tura an chhut fel sa diam a ni a, kum tin ruahtui tlak hun (rainy season) a thleng ziah tih pawh hriatchiansa a ni. Chuti chunga tun dinhmun min thlenpui hi chu a dik lo hle.
Dik lo dang chu, a ram leilung neitu state sawrkar hnuaia a mawhphurtu a kaihhnawih ministry/department te hi an ni, a tih theih bawk awm e. Mipui lam zawkin hnathawktute nawr nawr ngaia thil a awm thin hi a dik lo hle a, sawrkar thuneitute hian helai kawngpui siam hna hi an vil ang a, an nawr ang a, a tul chuan an vau zawk tur niawm tak a ni. Mahse, chung zawng zawng chu a thuneitu lo zawk mipui ten an tih a ngai tlat zel hi, dik lo dang chu a ni.
Awlsamna leh hmasawnna thlentu tur kawngpui zawkin harsatna a thlen zawk hlauh thin hi chu, a letling tlat.
Harsatna thlentu NH 302
