India chuan thenawm a nih angin Bangladesh prime minister hlui, Sheikh Hasina-i’n August, 2024-a an ram a tlanchhiatsan khan lo hum chu a tih tur a ni tih Bangladesh-a Indian High Commissioner Dinesh Trivedi-a’n a sawi.
Trivedi-a chuan India chuan ‘duhthlanna harsa tak’ a thlan a ngai a, ‘khatih hun lai khan Hasina-i kha Bangladesh prime minister a la ni tlat’ tih a sawi a. Awami League hruaitu hi India-ah Indian Air Force emaw, Army emaw an hruai a nih loh thu a sawi.
Inrinnia Dhaka-a Bay of Bengal Conversation 2026-a hun a hmannaah Trivedi-a hian thu a sawi a. Bangladeshi Prime Minister Tarique Rahman-a chuan a vawi nga nana intawh khawmah hian thu a sawi hmasa a, Trivedi-a thu sawi laiin a awm lo thung.
Hasina-i hi zirlaite kaihhruaia an rama a sorkar paih thlak a nih rualin India-ah a tlanchhe zui a. Thawn haw turin amah thlaktu sorkar lailawk, Muhammad Yunus-a kaihhruai khan an phut a, a hnuah Rahman-a kaihhruai Bangladesh Nationalist Party (BNP) sorkar pawhin an phut leh bawk.
India-a Hasina-i awm hian ram pahnih inkar pawh hi a tichhe hle a, kumin kum tira Rahman-a sorkar a din hnuah a ziaawm leh hret a. Hetih lai hian Dhaka hi tlanchhia ni chunga mi kawm (interview)-a a awm theih avangin a lawm lo hle a, an kawmnaah hian an ramah thi turin a chungthu rel mah se December-a haw a tum thu a sawi nghe nghe.
Trivedi-a chuan New Delhi-in a haw hun tura engmah tiam a nei thei lo tih a sawi a, an ramin thawn haw a dilna pawh dan hmanga en mek a ni tih a sawi.
Indian external affairs ministry pawhin a hmain Bangladeshi sorkarin an hruaitu hlui thawn haw tura a ngenna chu dan anga kalpui tura tih ngaite a en mek tih a lo sawi tawh thin.
Trivedi-a hian Hasina-i’n India a pan dan khan IAF leh sipaiten an phur lo tih a sawn bawk a. Bangladesh Air Force thlawhnain August 5-ah India a pan a. Bangladesh Army kaihhruaina hnuaia venhim hna thawktute an pisa an luhchilh dawn khan an hruai chhuak niin a sawi.
Hasina-i sorkar paih thlak a nih hnuah August 8, 2024 khan Yunus-a kaihhruai sorkar lailawk ding zuiin kum khat leh a chanve vel Bangladesh a kaihruai.
Yunus-a sorkarah hian India-Bangladesh inkar pawh a chhe hle a, a chhan ber chu Hasina-i thawn haw an dilna leh India-in a chhan that loh vang te, an rama sakhaw zuitu tlem zawk (Hindu) tihduhdahna thleng leh Dhaka-in China a hnaih zawk vang te a ni.
Kum 2025 khan Hasina-i hi amah awm lo chungin special tribunal-ah a chungthu relin thi tura hrem a ni a. Sorkar lailawk hian a party, Awami League pawh an awm khapin hruai haw theih nan palai pawh a tir.
February 12-a inthlanah Awami League chu an din ve phal a ni lo va, Rahman-a BNP sorkar ding zuiin Hasina-i party khapna leh amah hruai haw phutna a kalpui zui zel.
Thawn haw leh haw loh hian India-Bangladesh inkar tichhe zui zelin Rahman-a’n New Delhi a tlawh tura ruahman thlengin a nghawng.
India hian thla hmasaa BRICS Summit-a tel turin Rahman-a hi a sawm a, a tel lo va, New Delhi-in zin turin sawm mah se a la tlawh lo bawk.
Bangladesh hian prime minister-in India chu tlawh a tum tih chu a sawi a, a hun erawh an la sawi lo.
August 5-a Hasina-i’n a awm hmun atanga New Delhi-a thuthar lakhawmtute a kawm chuan ram pahnih inkar a tichhe thar bawk.
Hemi tum hian Hasina-i hian December-a a kir tur thu a sawi a, a chunga hremna an pekte avanga a haw loh phah loh tur thu a sawi a, “Ka mite hnenah ka kir leh dawn,” a ti.
Hasina-i lo hum kha kan tih tur a ni – Indian palai
